AZAL - “Neftçi”: Ya heç-heçə, ya da 1 qol

02.12.2010 - 13:37

Azərbaycan çempionatının XVI turunda keçiriləcək paytaxt derbisi turun mərkəzi oyunu olacaq. Apasport.az saytının məlumatına görə, turnir cədvəlinin ilk 3 pilləsində qərarlaşan “Neftçi” və AZAL tarixlərində 12-ci dəfə üz-üzə gələcəklər.

İndiyə qədər baş tutmuş qarşılaşmalarda “Neftçi” rəqibindən 2 qat güclü olub. “Ağ-qaralar” 4, “təyyarəçilər” 2 dəfə qələbə qazanıb. 5 dəfə heç-heçə ilə razılaşan rəqiblərin duelləri aşağı məhsuldarlıq ilə seçilir. 11 görüşdə cəmi 15 qol vurulub ki, bunun da 2/3-si “Neftçi”nin hesabındadır – 10:5.

Komandalar arasındakı axırıncı 4 oyunda 1-dən artıq qol vurulmayıb. AZAL son 4 matçda “Neftçi”nin qapısına qol vura bilmir. 2008-ci il noyabrın 30-da keçirilən XIII turun qarşılaşmasının 90+1-ci dəqiqəsində gürcü yarımmüdafiəçisi Revaz Getsadzenin vurduğu top bu mənada sonuncu olub və 2 il 4 gün (matçın keçiriləcəyi dekabrın 4-ə kimi), yəni 735 günlük həsrətə start verib.

“Neftçi” isə “təyyarəçilər”in qapısına 1-dən artıq qol vurmaqda çətinlik çəkir. Son 8 matçda rəqib qapısına 4 top vuran “ağ-qaralar” 2006-cı ilin noyabrın 27-dəkı darmadağından sonra ya 1 top vurur, ya da heç fərqlənə bilmir.

Tarix	Oyun	Hesab
26.11.2005	“Neftçi” - “Olimpik”	0 : 0
29.04.2006	“Olimpik” - “Neftçi”	1 : 3
27.11.2006	“Neftçi” - “Olimpik”	3 : 0
17.05.2007	“Olimpik” - “Neftçi”	2 : 1
06.10.2007	“Neftçi” - “Olimpik”	0 : 0
13.04.2008	“Olimpik” - “Neftçi”	0 : 0
30.11.2008	“Neftçi” - “Olimpik”	1 : 2
17.05.2009	“Olimpik” - “Neftçi”	0 : 0
16.08.2009	“Olimpik-Şüvəlan” - “Neftçi”	0 : 1
29.11.2009	“Neftçi” - “Olimpik-Şüvəlan”	0 : 0
01.10.2010	“Neftçi” - AZAL	1 : 0