“Fənərbaxça”nı Çempionlar Liqasının (ÇL) qrup mərhələsində əvəzləyəcək komandanın adı dəqiqləşib. Apasport.az saytının məlumatına görə, UEFA danışılmış oyunlara əlaqədar avrokuboklardan xaric edilən İstanbul təmsilçisini vitse-çempion “Trabzonspor”un əvəzləyəcəyi haqda qərar çıxarıb. Bununla, Trabzon təmsilçisi tarixində ilk dəfə ÇL-in qrup mərhələsində oynamaq hüququ qazanıb.

Əslində, ötən mövsümün yekununa əsasən “Trabzonspor”un “Fənərbaxça” ilə xalları bərabər olmuş, sadəcə, sonuncular daha yaxşı top fərqinə görə çempion olmuşdu. ÇL-də mübarizəyə III təsnifat mərhələsindən başlayan Şenol Günəşin çalışdırdığı komanda “Benfika”ya uduzaraq (səfərdə 0:2, evdə 0:0), turnirlə vidalaşmışdı. Bundan sonra Avroliqada oynamaq hüququ qazanan “Trabzonspor” səfərdə qolsuz bərabərliyə qaldığı İspaniyanın “Atletik” klubu ilə bu gün evdə cavab görüşünə çıxmalı idi. Ancaq UEFA-nın qərarından sonra həmin oyun ləğv olunub və “Atletik” avtomatik Avroliqanın qrup mərhələsinə vəsiqə qazanıb.

Qeyd edək ki, ÇL-in püşkü bu gün Bakı vaxtilə saat 20:45-də atılacaq. “Trabzonspor” debütant kimi aşağı reytinqi olduğundan, sonuncu – 4-cü səbətdə yer alıb.

• Braziliya klubunda yeni təyinat
• “Barselona”dan Kanselo qərarı
• "Real" - "Bavariya" matçı bu kanalda - TV Afişa
• “Fənər”in heyətində ciddi itki
• Braziliya klubunda ayrılıq