“İnter”in çexiyalı yarımmüdafiəçisi Bronislav Çervenka klubunun saytına müsahibəsində “Neftçi” və Premyer Liqanın növbəti turunda “Qəbələ” ilə keçiriləcək oyun barədə danışıb.

- “Neftçi” ilə oyun çox çətin alındı. Təəssüf ki, komanda məğlub oldu. Biz meydana yalnız qələbə üçün çıxmışdıq, lakin heç-heç də bizim üçün pis nəticə olmazdı. Axı o halda, “Neftçi”ni turnir cədvəlində irəliyə buraxmazdıq və aramızda bir xal fərqi qalardı. Təəssüf ki, alınmadı və fərq 4 xala çatdı.

- İkinci hissədə “İnter” rəqibə heç bir cəhətdən uduzmadı, amma bununla belə, standart vəziyyətdən qol buraxdı…
- Bu qarşılaşmanın taleyini standart vəziyyətlər həll etdi. Rəqib cərimə zərbəsini yetirmək hüququ qazandı və ondan istifadə etdi. Futbolçu qapıya birbaşa zərbə endirmək qərarı aldı və onun zərbəsi əla alındı.

- Məğlubiyyət “Neftçi” ilə xal fərqini 4-ə çatdırdı. 3 və 4-cü yerlərdə qərarlaşan komandalar da “İnter”i yaxından təqib edirlər…
- Qarşıda hələ 8 tur var və “Neftçi”yə çatmağa çalışacağıq. Hər oyuna qələbə ardınca çıxırıq. Bizə xal toplamaq lazımdır. Əminəm ki, hələ heç nə itirilməyib və biz çempionatda intriqanı saxlamağa çalışacağıq.

- Bu, “İnter”in son 8 gündə artıq 3-cü oyunu idi. Belə sərt qrafikdə oynamaq çətin deyil ki?
- İlk “altılığ”ın bütün komandaları belə qrafikdə oynayırlar. Biz belə şərtlərə alışmışıq, əlbəttə, belə ritmdə oynamaq çətindir. Lakin düşünürəm ki, biz iki cəbhədə mübarizə apara bilərik.

- Artıq şənbə günü “İnter”i səfərdə “Qəbələ” ilə çətin oyun gözləyir. Rəqib komanda və qarşıdakı oyun barədə nə fikirləşirsiniz?
- Son zamanlar “Qəbələ”nin matçlarını izləmək imkanım olub və demək istərdim ki, bu komanda kifayət qədər maraqlı futbol sərgiləyir. Bir sözlə, Qəbələdə çox çətin qarşılaşma olacaq. Özümüzü yaxşı tərəfdən göstərməyə çalışacağıq.

• “Fənərbaxça” Ahmet Çakarın iddialarına cavab verdi
• “Real”da ciddi itki
• Nəriman oynadı, komandası məğlub oldu
• “Sportinq”də yeni müqavilə - RƏSMİ
• Günün oyunları bu kanallarda - TV AFİŞA