“Qarabağ”&“Qəbələ”: 17-ci dueldə kim sevinəcək?

27.03.2012 - 15:19

“Qarabağ” sabah növbəti dəfə “Qəbələ” ilə qarşılaşacaq. Apasport.az-ın Ağdam təmsilçisinin rəsmi saytına istinadən məlumatına görə, komanda 2 həftə öncə Azərbaycan kubokunun 1/4 final mərhələsinin Qəbələdə qeydə alınmış 2:2 hesabının revanşına çıxacaq.

Tərəflərin qarşılaşma tarixi cəmi 5 il olsa da, daim gərgin və maraqlı oyunlar duelləri zənginləşdirib. İndiyə kimi “Qarabağ” və “Qəbələ” 16 dəfə üz-üzə gəlib. Bunlarda üstünlük Ağdam təmsilçisindədir: onlar 6 dəfə qələbə sevincini yaşayıblar. Qəbələlilər isə 3 dəfə 3 xalla öyünüblər. Maraqlıdır ki, tərəflər arasında baş tutan ilk 5 qarşılaşmada “Qarabağ” qələbə qazanıb və 4 oyunda 2 top üstünlüyü qeydə alınıb (1 dəfə 3:2). Ardınca 3 heç-heçədən sonra nəhayət “Qəbələ” 3:1 hesabı ilə qalib gəlib.
Bu klublar arasında yeganə böyükhesablı qələbə ötən mövsüm qeydə alınıb. Ağdam təmsilçisi Suraxanıda 3:0 hesabı ilə rəqibini məğlub edib. Topların fərqində də “Qarabağ” üstündür – 21-15.

Cari mövsümdə isə artıq tərəflərin 4 görüşü baş tutub. Avqustun 27-sində baş tutan ilk görüşdə Mendinin vurduğu qolla qalib gələn qəbələlilər həm səfərdə ilk dəfə “Qarabağ”ı məğlub ediblər, həm də ağdamlılar mövsümdə ilk məğlubiyyətini alıblar. Növbəti 3 görüş isə sülhlə yekunlaşıb. Təsnifat mərhələsinin cavab görüşü qolsuzluqla yekunlaşıb. Martın 14-ü və 18-i fərqli meydanlarda və fərqli turnirlərdə tərəflər yenə qələbəyə həsrət qalıblar. Özü də hər 2 oyunda “Qarabağ” hesabda geri olsa da, son dəqiqədə vurduğu qollarla heç-heçəyə nail olublar - 2:2 və 1:1.

Ümumiyyətlə, “Qəbələ” cari mövsüm eyni zamanda Ağdam təmsilçisinin daha bir seriyasına son qoyub. Belə ki, 2011-ci ilin dekabrın 21-də baş tutan oyunda qeydə alınmış qolsuzluqdan sonra “Qarabağ” ardıcıl 5 oyunda qələbə qazanaraq, mövsümün ən yaxşı seriyasına yiyələndi. Amma “Qəbələ” ilə matçdan sonra başlayan uğurlu oyunlar “Qəbələ” ilə növbəti dueldə də başa çatdı.

“Qarabağ” – “Qəbələ”, bütün oyunlar

20.08.2006	Premyer Liqa	Gilan(Qəbələ) - Qarabağ (Ağdam)	0:2
22.02.2007	Premyer Liqa	Qarabağ (Ağdam) - Gilan (Qəbələ)	3:2
06.10.2007	Premyer Liqa	Qəbələ - Qarabağ (Ağdam)	1:2
13.04.2008	Premyer Liqa	Qarabağ (Ağdam) - Qəbələ	2:1
20.09.2008	Premyer Liqa	Qəbələ - Qarabağ (Ağdam)	1:2
15.03.2009	Premyer Liqa	Qarabağ (Ağdam) - Qəbələ	0:0
23.09.2009	Premyer Liqa	Qarabağ (Ağdam) - Qəbələ	0:0
06.12.2009	Premyer Liqa	Qəbələ - Qarabağ (Ağdam)	1:1
21.03.2010	Premyer Liqa	Qəbələ - Qarabağ (Ağdam)	3:1
24.04.2010	Premyer Liqa	Qarabağ (Ağdam) - Qəbələ	1:1
25.09.2010	Premyer Liqa	Qəbələ - Qarabağ (Ağdam)	2:1
13.02.2011	Premyer Liqa	Qarabağ (Ağdam) - Qəbələ	3:0
27.08.2011	Premyer Liqa	Qarabağ (Ağdam) - Qəbələ	0:1
21.12.2011	Premyer Liqa	Qəbələ - Qarabağ (Ağdam)	0:0
14.03.2012	Kubok	Qəbələ - Qarabağ (Ağdam)	2:2
18.03.2012	Premyer Liqa	Qarabağ (Ağdam) - Qəbələ	1:1