Sabah Premyer Liqada “altılığ”ın II dövrəsinə start veriləcək. Apasport.az saytının məlumatına görə, dövrlərarası fasilə olmadığından komandalar mübarizəni istirahətsiz davam etdirəcəklər.

XXVIII turun ilk oyun günündə mükafatçılar uğrunda mübarizə olacağından, maraq daha böyükdür. İkinci “altılıq”da isə AZAL – “Rəvan” qarşılaşmasını qeyd etmək olar. Çünki həmin matçın nəticəsi 7-ci yerin sahibinə, yəni II “altılığ”ın çempionluğuna böyük ölçüdə aydınlıq gətirəcək.

Sabahkı oyunların ikisi Bakıda keçiriləcək. Müxtəlif vaxtlarda başlayacağından həmin qarşılaşmaları televiziyadan canlı izləmək mümkün olacaq. Start matçında prinsipial rəqiblər sayılan “Bakı” ilə “Xəzər Lənkəran”ın maraqlı mübarizəsi gözlənilir.

Bu, “zolaqlılar” üçün əsasən iddia etdiyi ölkə kuboku öncəsi sınaq olacaq. Belə ki, “Bakı” növbəti həftə kubokun ilk yarımfinal oyununda “Qarabağ”ı qəbul edəcək. FİFA ilə qalmaqala görə “Xəzər Lənkəran”ın 6 xal silinəcəyi halda, turnir cədvəlində vəziyyət dəyişərək, yeni mənzərə yaranacaq. Bu mənada 4-cü pilləyə düşəcək cənub təmsilçisinin ən yaxın izləyiciləri olan “Qəbələ” ilə “Bakı”nın çempionatdan Avropaya vəsiqə qazanmaq şansı artır. Ona görə də II dövrədə avrokuboklar uğrunda mübarizənin daha gərgin keçəcəyi gözlənilir.

“Neftçi” ardıcıl 2-ci tur evdə Bakı derbisinə çıxacaq. “Bakı"dan sonra “İnter”i qəbul edəcək lider kubokdakı növbəti rəqibini sınağa çəkəcək. Belə ki, “İnter”lə “Neftçi” aprelin 14-də məhz bu turnirdə görüşəcək və ilk yarımfinal matçı “Şəfa” stadionunda olacaq. Deməli, prinsipial rəqiblər 4 gündə 2 dəfə bir-birinin meydanında üzləşəcək. “Neftçi” “altılığ”ın ilk dövrəsində olduğu kimi, “İnter”ə qalib gələrsə, həmşəhərlilərinin çempionluq şansını lap azaldacaq, özünün titulunu qorumaq mübarizəsində növbəti addım atacaq.

“Qəbələ” ilə “Qarabağ” üçün kubok mübarizəsi artıq başa çatıb. Ötən mərhələdə üzləşən əyalət təmsilçilərinin duelinin hər ikisi bərabərliklə nəticələndi – 2:2, 0:0. Sadəcə, “Qarabağ” kubokun qaydalarına görə səfərdə vurduğu qollara görə yarımfinala çıxdı. İndi ağdamlılar ona uğur gətirən həmin meydançada vacib çempionat matçına çıxacaq. Belə ki, “Qarabağ”a çempionluq mübarizəsində 3 xal vacibdir. “Qəbələ” isə kubokdan kənarda qaldıqdan sonra bütün diqqətini Premyer Liqaya yönəldib və 4-cü yeri tutsa belə, Avroliqaya vəsiqə qazana bilər. “Qarabağ”ın uzun müddətdir “Qəbələ”yə qalib gəlməməyi də oyuna marağı artırır.

14 aprel

15:00. “Bakı” – “Xəzər Lənkəran”
Bakı. “Bakı”nın təlim-məşq bazasının stadionu
Cari mövsümdəki oyunlar – 2:2, 0:3, 1:0

16:00. “Qəbələ” – “Qarabağ”
Qəbələ. Şəhər stadionu
Cari mövsümdəki oyunlar – 1:0, 0:0, 1:1

17:30. “Neftçi” – “İnter”
Bakı. İsmət Qayıbov adına Bakıxanov adına qəsəbə stadionu
Cari mövsümdəki oyunlar – 1:2, 1:0, 2:1

15 aprel

15:00. “Sumqayıt” – “Kəpəz”
Sumqayıt. Mehdi Hüseynzadə adına şəhər stadionu
Cari mövsümdəki oyunlar – 1:1, 4:1, 1:4

16:00. AZAL – “Rəvan”
Bakı. “AZAL Arena” stadionu
Cari mövsümdəki oyunlar – 2:1, 3:1, 2:0

16:00. “Turan” – “Simurq”
Tovuz. Şəhər stadionu
Cari mövsümdəki oyunlar – 1:0, 1:2, 1:1

	komandalar	o	q	h	m	t	x
1	Neftçi	27	18	3	6	51-24	57
2	Xəzər L	27	15	6	6	37-22	51
3	Qarabağ	27	14	8	5	32-17	50
4	İnter	27	14	7	6	25-17	49
5	Qəbələ	27	12	7	9	35-29	42
6	Bakı	27	12	5	10	32-28	41
7	AZAL	27	10	6	11	40-42	36
8	Rəvan	27	8	8	11	27-32	32
9	Kəpəz	27	8	5	14	32-44	29
10	Simurq	27	6	7	14	23-39	25
11	Turan	27	6	4	17	22-36	22
12	Sumqayıt	27	4	5	18	20-46	17

Bombardir: Bahodir Nasimov (Neftçi) – 15 qol.

• Türkiyə Kuboku: İlk finalçı bəlli oldu
• Hakan Safi “Fənərbaxça” prezidentliyinə namizədliyini açıqladı
• “Fənərbaxça”da seçki yarışı qızışır: Aydınlar qərarını açıqladı
• Fodenin taleyinə aydınlıq gəldi
• Terziç rəsmən “Atletik”də