Topaz Premyer Liqasının XVIII turunda “Qarabağ”a 0:2 hesabı ilə uduzan “İnter” klubunun ispaniyalı yarımmüdafiəçisi Mikel Alvaro apasport.az saytının əməkdaşının suallarını cavablandırıb.

- Qarşılaşma haqqında nə deyə bilərsiniz?
- Fikrimcə, biz yaxşı oynadıq. İlk hissədə Vaqif Cavadovun qol vurmaq şansı oldu. Elə ikinci hissədə meydana daxil olan, mənim də fərqlənmək imkanım vardı. Ancaq alınmadı. Biz rəqibə uduzmalı deyildik.

- Komandanız ilk qolu müdafiədəki kobud səhvdən sonra buraxdı...
- Elədir. Halbuki, biz daha çox topla rəftar edən və daha çox hücum edən komanda idik. Ancaq təəssüf ki, məğlub olduq.

- “İnter” üçün mövsümün ilk hissəsini necə dəyərləndirərdiniz?
- Çempionata çox pis qoşulduq. Çoxlu oyunları uduzduq. Turnir cədvəlində 7-ci yerdə idik. Düzdür, sonradan özümüzə gəlməyə başladıq. Yenə bugünkü kimi məğlubiyyətimiz oldu. Ancaq düşünürəm ki, indi mövsümün əvvəlində sərgilədiyimiz futbola baxanda, daha yaxşı təsir bağışlayırıq.

- Cari mövsümün bundan sonrakı oyunları üçün hədəfiniz nədir?
- Fasilədən sonra çempionata yaxşı başlasaq, daha yüksək pillələrdə qərarlaşmağımız mümkündür. Avrokubok imkanlarımız məhdud deyil.

- Ancaq çempionluq mümkünsüz görünür...
- Premyer Liqa qalibi olmaq üçün gərək hər oyunda qələbələri sıralayaq. Belədə çempionluğun mümkünsüz olmadığını düşünürəm.

Səbuhi TOFİQOĞLU

• Dieqo Karlos rəsmən “Parma”da
• “Çelsi” transfer etdi, birbaşa icarəyə verdi
• “Trabzonspor” Fatih Tekke ilə yollarını ayırıb
• Mahir Emrelinin komandasında baş məşqçi dəyişikliyi – “Rakuv” seçim etdi
• Qabriel Jezus “Barselona”da – 2029-cu ilədək müqavilə