14 turda 14 dəfə: Yalnız “Qarabağ” cəzalanmayıb

12.12.2019 - 17:47

Azərbaycan Premyer Liqasında mövsümün başa çatan ilk yarısında qapılara 14 penalti zərbəsi təyin olunub.

Apasport.az saytının məlumatına görə, 14 turun 56 oyununda vurulan 11 metrlik cərimə zərbələrindən 11-i dəqiq olub.

3 dəfə imkanı qaçıran futbolçuların dəqiqlik faizi 78,6-ya bərabərdir.

Penaltilərdən 8-i meydan sahibləri, 3-ü qonaqların lehinə verilib. Maraqlıdır ki, imkanı qaçıranların hamısı ev oyununda 11 metrlikdən qeyri-dəqiq olub.

İki dövrə ərzində Premyer Liqanın 5 komandası bu yolla fərqlənmək imkanı qazanıb. “Sumqayıt”la “Səbail” digərləri ilə müqayisədə daha çox penalti vurub.

Penalti vuran komandalar: “Sumqayıt” – 5 zərbə (1 qeyri-dəqiq), “Səbail” – 4 (1), “Neftçi” – 2, “Zirə” – 2 (1), “Qarabağ” – 1. Penalti vurmayan komandalar: “Qəbələ”, “Sabah”, “Keşlə”.

Mövsümün 7 komanda 11 metrlik nöqtədən zərbələrlə cəzalanıb. Yalnız bir klub – çempionatın lideri “Qarabağ” hakimlərin qəzəbindən qaçıbsa, “Sumqayıt”la “Neftçi” daha çox cəzalanıb.

Penalti ilə cəzalanan komandalar: “Sumqayıt” – 3, “Neftçi” – 3 (1), “Keşlə”, “Qəbələ”, “Zirə” – 2, “Sabah”, “Səbail” – 1 (1). Penalti ilə cəzalanmayıb: “Qarabağ”.

5 ay davam edən ilk yarıda 4 futbolçu bir dəfədən artıq belə zərbə vurub. Onların hamısı iki imkan əldə edib. Üç oyunçu hər iki şansdan yararlanıbsa, biri 50 faizlik nəticə göstərib.

Ən çox penalti vuran futbolçular: Emin Mahmudov, Peyman Babayev, Mehdi Şərifi – 2, Ağabala Ramazanov – 2 (1).

14 tur ərzində 8 hakim penalti təyin edib. Onlar arasında rekordçu Əliyar Ağayevlə Vüqar Həsənlidir.

Penalti təyin edən hakimlər: Əliyar Ağayev, Vüqar Həsənli – 3, Orxan Məmmədov, Səbuhi Bayramov – 2,
Elçin Məsiyev, İnqilab Məmmədov, Rövşən Rəcəbov, Rəvan Həmzəzadə - 1.

İlk yarının 56 oyunundan ikisində 1-dən artıq penalti vurulub. Hər iki qarşılaşma Sumqayıtda keçirilib.

II turun “Sumqayıt” – “Səbail” matçında (0:3) V.Həsənli hər qapıya bir belə zərbə təyin edib. Meydan sahibləri şansı qaçırıbsa, qonaqlar dəqiq olub.

IX turda keçirilən “Sumqayıt” – “Neftçi” oyununda (2:4) mövsümün penalti rekordu qeydə alınıb. Ə.Ağayev 1 dəfə bakılıları, 2 dəfə sumqayıtlıları cəzalandırıb. Bütün zərbələr dəqiq olub.