AFFA-dan vacib qərarlar – İcraiyyə Komitəsində

31.05.2021 - 18:57

AFFA-nın İcraiyyə Komitəsinin növbəti iclası keçirilib.

Apasport.az qurumun saytına istinadən xəbər verir ki, yığıncaq videokonfrans formatında baş tutub.

Komitə üzvləri bir sıra vacib məsələləri müzakirə edib. İclasda bəri qərarlar qəbul olunub.

1. AFFA-nın İntizam Komitəsinin sədri və aşağıda adı göstərilmiş üzvləri təsdiq olunsun:
- Sədr: Erkin Hüseynov
- Üzvlər: Cahangir Həsənzadə, Məhəmməd İsmayılov

2. Oyunçuların Statusu və Transferi Komitəsinin yeni Əsasnaməsinin təsdiq olunsun

3. Frits Ştuxlikin Hakimlər Komitəsinin sədri vəzifəsində müqaviləsinin müddəti uzadılsın

4. Babək Quliyev Hakimlər Komitəsinin üzvü vəzifəsinə təsdiq olunsun (vakant yerə)

5. Hakimlər üçün “Tofiq Bəhramov mükafatı”nın Əsasnaməsi təsdiqlənsin. Mükafat 2021-2022-ci il mövsümündən etibarən təqdim olunsun

6. Birinci Divizionda limit aşağıdakı kimi müəyyənləşsin:
5 nəfər təvəllüdü 2000-ci ilə qədər olan futbolçu, 6 nəfər yaş məhdudiyyəti olmadan. Yaş məhdudiyyəti tətbiq olunmayan 6 futbolçudan 2-si legioner ola bilər

7. Əvəzedici komandası Birinci Divizionda və qadınlardan ibarət komandaları müvafiq liqalarda iştirak etməyən klubların 2020-2021-ci il mövsümü üçün nəzərdə tutulan müvafiq cəriməsi COVİD-19 pandemiyası ilə əlaqədar ləğv olunsun. 2021-2022-ci il mövsümündə əvəzedici komandasının Birinci Divizionda iştirakını təsdiq etməyən klub müvafiq qaydada 150.000 (yüz əlli min) AZN cərimə məbləğini 3 ay ərzində ödəməlidir. Əvəzedici komandası Birinci Divizionda iştirak edən hər bir kluba AFFA tərəfindən 50.000 (əlli min) AZN ödənilsin;

8. Pandemiya səbəbindən futzal üzrə ölkə çempionatının keçirilməməsi nəzərə alınaraq, növbəti mövsüm futzal üzrə UEFA kubokunda çıxış edəcək klubun müəyyənləşdirilməsi Futzal Federasiyasına tapşırılsın

9. Futzal üzrə Azərbaycan milli komandasının baş məşqçisi Joze Alesio Da Silva ilə müqavəli 1 il müddətinə uzadılsın

10. 2021-2022-ci il mövsümündən başlayaraq Birinci Divizionda çıxış edən ən azı 2 kluba 2022-2023-cü mövsümündən etibarən sponsorların tapılması məqsədilə AFFA tərəfindən çalışmalara başlanılsın (klublar sponsor tapılmasında çətinliklər yaşadığı üçün)

11. Növbəti mövsüm üçün Birinci Divizion klublarından heç birinin Premyer Liqa ilə bağlı lisenziya şərtlərini yerinə yetirə bilməməsi və pandemiya ilə bağlı ortaya çıxan çətinliklər nəzərə alınaraq, Premyer Liqada növbəti mövsüm də ötən mövsüm çıxış etmiş komandalar iştirak etsin.

İclasda məlumat verilib ki, “Turan Tovuz” Futbol Klubunun nəzdində inşa olunmuş Akademiyanın saxlanılması üçün 1 illik 400 000.00 AZN vəsait tələb olunur. Bununla əlaqədar AFFA tərəfindən FIFA-ya müraciət ünvanlanıb. Layihə FIFA tərəfindən müsbət dəyərləndirilib. Növbəti 3 il ərzində “Turan Tovuz” Futbol Klubunun nəzdindəki akademiya FIFA-nın ayırdığı vəsait hesabına maliyyələşəcək.