“Qızıl top” mükafatının səsverməsində Azərbaycanı təmsil edən jurnalist Rasim Mövsümzadənin səs verdiyi futbolçular müəyyənləşib.
Apasport.az saytının məlumatına görə, “France Football” nəşrinin sorğularının daimi iştirakçısı olan həmyerlimizin səs verdiyi 5 oyunçu yekun sıralamada da ilk “beşlik”də qərarlaşıb.
R.Mövsümzadə İngiltərənin “Liverpul” klubu ilə Çempionlar Liqasının qalibi olan üç futbolçunu ön sıralara layiq görüb. O, niderlandlı Vircil van Diyki 1-ci, seneqallı Sadio Maneni 2-ci, misirli Məhəmməd Salahı 3-cü yerdə göstərib. Həmkarımızın seçimində argentinalı Lionel Messi (“Barselona”) 4-cü, portuqaliyalı Kriştianu Ronaldo (“Yuventus”) 5-ci olub.
Azərbaycan təmsilçisi sonda ilk “beşlik”də qərarlaşanların adlarını düzgü müəyyənləşdirsə də, yekun sıralamadakı yerləri fərqli olub. “France Football”ın səsverməsində L.Messi 1-ci, V.Van Diyk 2-ci, K.Ronaldo 3-cü, S.Mane 4-cü, M.Salah 5-ci pilləni tutub.
Qeyd edək ki, Argentina millisinin hücumçusu 6-cı dəfə “Qızıl top”a layiq görülüb.