Superliqa təşəbbüsünün səbəblərindən biri - ən yüksək ödənişli uğursuz transferlər

02.05.2021 - 16:16

Son illərin ən yüksək ödənişli uğursuz transferlərinin siyahısı açıqlanıb.

Apasport.az saytının məlumatına görə, cədvəldə 7 futbolçu göstərilib.

Maraqlıdır ki, yazıda Avropa nəhənglərinin Superliqanı yaratmaq cəhdlərindən biri də məhz uğursuz transferlərə xərclənən pullar səbəbindən klubların ciddi maliyyə problemi yaşaması göstərilib.

Kepa Arrizabalaqa
80 milyon avro ilə bütün dövrlərin ən baha qapıçısı ünvanına yiyələnən Kepa hazırda “Çelsi”də ehtiyata məhkum olub. Ardıcıl səhvlərlə yanaşı, məşqçilərlə də yola getməyən ispaniyalı qolkiper Eduard Mendinin gəlişindən sonra çərçivəni unudub.

Filipp Koutinyo
Braziliyalı dünyanın ən bahalı qış transferidir. 145 milyon avro qarşılığında “Liverpul”dan “Barselona”ya keçən yarımmüdafiəçi nə icarə əsasında yollandığı “Bavariya”da, nə də hazırkı komandasında əsas heyətə düşə bildi.

Pol Poqba
Öz mövqeyinin ən yaxşılarından olan Poqba “Mançester Yunayted”ə keçəndə transfer rekordu yeniləmişdi. Ancaq 105 milyon avroya dəyəcək performans ortaya qoya bilmir. Hələ də Premyer Liqa çempionluğu qazanmayan fransalı “qırmızı şeytanlar”da tez-tez özünü unutdurur.

Qaret Beyl
Beyl futbol tarixində 100 milyon avroya klub dəyişən ilk futbolçudur. “Real”da heç də uğursuz start götürməmişdi. Ancaq tezliklə gözdən düşdü və heyətdəki yerini itirdi. Uelsli hücumçunun həftəlik maaşı 600 min avro olduğundan, heç kim onu almağa cürət etmir. Beyl hazırda “Tottenhem”də icarə əsasında çıxış edir.

Eden Azar
Belçikalı ulduz futbolçu “Real”a iki il əvvəl 100 milyon avro qarşılığında qoşuldu. Ancaq geridə qalan iki il ərzində cəmi 37 matçda iştirak edib və 4 qol vurub. “Real” bu müddətdə zədələrdən qurtula bilməyən Azar üçün maaşla birlikdə 150 milyon avro xərc çəkib.

Usman Dembele
Neymarı 222 milyon avroya PSJ-yə göndərən “Barselona” onun boşluğunu Dembele ilə doldurmağa çalışdı. Dortmund “Borussiya”sında möhtəşəm çıxışı ilə seçilən fransalı kataloniyalılarda olduğu müddətdə əsasən zədələrlə mübarizə apardı. Buraxdığı oyun keçidiyi matç sayından çoxdur.

Məsut Özil
Arsen Venger dönəmində “Arsenal”ın ən bahalı transferi olan Özilin həftəlik 350 min funt-sterlinqlik maaşını “topçular” ödəməkdə çətinlik çəkirdilər. Mikel Artetanın gəlişi isə Almaniya millisinin üzvünün əsas heyətə yolunu bağladı. Yekunda London təmsilçisi onunla müqaviləyə xitam verərək, “Fənərbaxça”ya keçməsinə köməklik göstərdi.