Almaniyanın “Karlsrue” klubunun futbolçusu Dmitri Nazarov bu gündən millimizin avqustun 20-də Özbəkistanla keçiriləcək yoldaşlıq oyununun hazırlıqlarına qoşulub. O, jurnalistlərə müsahibəsində apasport.az saytının əməkdaşının da suallarını cavablandırıb.
- Özünüzü necə hiss edirsiniz?
- Yaxşıyam. Formadayam. Hər şey qaydasındadı.
- İsti hava futbolçulara problem yaratmır ki?
- Almaniya ilə burdakı hava fərqlidi. Ancaq adaptasiya olunacağam. Heç bir problem yoxdu.
- Millinin düşərgəsində sizi daha çox təəccübləndirən nədi?
- Yığmada futbolçuların əksəriyyəti almanca danışır. Onların mənim bura öyrəşməyimə çox köməyi olacaq.
- Azərbaycanla bağlılığınız haqda nə deyə bilərsiniz?
- Babam Azərbaycandadı. Təəssüflər olsun ki, indi yaşamır.
- Azərbaycanca heç olmasa, 2-3 söz bilirsiniz?
- Təəssüf ki, yox.
- Babanız Azərbaycanın hansı bölgəsindən olub?
- Bu barədə nənəmlə söhbət etmişik. Ancaq babamın hansı bölgədən olduğunu bilmirəm.
- Ümumiyyətlə, burda milliləşdirilən futbolçulara yaxşı yanaşılmır...
- Əsas odur ki, babamın Azərbaycandan olduğunu bilirəm. Özüm bu yığmada oynamaq istəyirəm. Bu millinin uğuru üçün əlimdən gələni edəcəyəm.
- Bir müddət əvvəl sizi Qazaxıstan Futbol Federasiyası (QFF) da millisinə cəlb etmək istəyirdi. Yenə həmin qurumdan sizinlə əlaqə saxlayırlar?
- Keçmişdə də olub, bir müddət əvvəl də mənimlə əlaqə saxlamışdılar. Ancaq mən qərar qəbul etdim ki, Azərbaycan millisində oynayacağam.
- Bəs Qazaxıstanla nə bağlılığınız var?
- Özüm orda doğulmuşam. Amma AFFA rəhbərliyi və Berti Foqtsla söhbətlərdən sonra qərara gəldim ki, Azərbaycan üçün oynayım. Hazırda Qazaxıstan yığması mənim üçün maraqlı deyil.
- Almaniya kubokunda dünən “Noybrandenburq”u səfərdə 3:1 hesabı ilə məğlub etməklə II mərhələyə vəsiqə qazandınız. Bu haqda nə deyə bilərsiniz?
- Həmin görüşdə qalib gəlməliydik. Çünki rəqibimiz V dəstənin komandası idi. İndi böyük həvəslə püşkatmanı gözləyirik. Ümid edirəm ki, azarkeşlərimizi sevindirəcək tanınmış bir rəqiblə düşəcəyik.
Səbuhi TOFİQOĞLU
Oxşar xəbərlər
Ana səhifə
Bütün xəbərlər