“Azərbaycanın 6 komandası Antalyada təlim-məşq toplanışındadı. Ölkənin ən böyük klubları “Qarabağ” və “Neftçi”di. Neçə gündü ki, Antalyadayam. Milliyə namizəd oyunçuları izləyirəm. Onlar əsasən 4 ən güclü komandada cəmləniblər. Bundan əlavə, aşağı yaş qrupları üzrə milliləri də diqqətdə saxlayıram”. Apasport.az saytının məlumatına görə, bu sözləri Azərbaycan yığmasının baş məşqçisi Robert Prosineçki deyib.
Xorvatiya mətbuatına danışan 46 yaşlı çalışdırıcı Azərbaycan futbolu haqda müsbət fikirlər səsləndirib. Prosineçki indidən fikrini Malta ilə oyuna yönəltdiyini bildirib: “Fevralda 6 günlük toplanışımız olacaq. Çox vaxtımız yoxdu. Martın 28-də bizi Malta ilə seçmə mərhələnin oyunu gözləyir. Həmin matçdan yaxşı nəticə ilə ayrılmalıyıq. Azərbaycan millisinin böyük potensialı var. Xüsusilə aşağı yaş qrupları üzrə yığmalarda bunu asanlıqla sezmək olur”.
Millimizlə 3 illik müqaviləsi olan Prosineçki Azərbaycanda çalışmağın çətin olmadığını qeyd edib: “İş hər yerdə işdi. Buna görə də, Azərbaycanda çalışdığımı böyütmək lazım deyil. İndiki vəziyyətdə əsas vəzifəmiz bu seçmə mərhələnin növbəti oyunlarından yaxşı nəticə ilə ayrılmaqdı. DÇ-2018-nin təsnifat mərhələsində isə qrupun ən yaxşılarından olmağa çalışacağıq”.
“Azərbaycan yığması yaxın zamanlarda qitə və dünya çempionatlarının final mərhələsinə vəsiqə əldə edə biləcəkmi?” sualına Prosineçkinin cavabı belə olub: “Biz böyük işlər görmək istəyirik. Azərbaycanda istedadlı gənc futbolçular var. Amma çox iş görmək lazımdı. Gəlişimdən sonra hər şeyin əla olacağını demirəm. Lakin ən pis halda, daha yaxşı oyun göstərməyə çalışacağıq. Azərbaycan haqda təəssüratlarım əladı. İdmana böyük investisiyalar qoyulur, xüsusilə də futbola. İnfrastruktur da yaxşı vəziyyətdədi. Bütün bu imkanların qarşılığında elə futbolçu nəsli yetişdirmək lazımdı ki, böyük turnirlərə vəsiqə qazanmaq üçün oynasın”.
Oxşar xəbərlər
Ana səhifə
Bütün xəbərlər