[b]“İnter”in rəqibi: Doğulduğu vətəninə xəyanət edən erməninin komandası[/b]

23.06.2014 - 17:33

Ölkəmizi növbəti dəfə avrokuboklarda təmsil edəcək “İnter”in Avroliqanın I təsnifat mərhələsindəki rəqibi bəllidir. Apasport.az saytının məlumatına görə, “bankirlər” Moldovanın “Tiraspol” klubu ilə gücünü sınayacaq.

“Tiraspol” 1992-ci ildə yaradılıb. Ancaq komanda əvvəl paytaxt Kişinyovu “Konstruktorul” adı ilə təmsil edib. Bu klub bu adla 1996 və 2000-ci illərdə Moldova kubokunu qazanıb. 2001-ci ilin iyulunda klub Kişinyovdan Çobruçiyə, 1 il sonra isə tanınmamış Dnestryanı Respublikanın paytaxtı olan Tiraspola köçüb. Məhz 2002-ci ildən bu komandaya təmsil etdiyi şəhərin adı verilib.

1996-cı ildə yeganə ölkə çempionluğunu da qazanan klub Moldovanı tarixində ilk dəfə Çempionlar Liqasında təmsil edib. Ancaq Belarusun “Slaviya” klubunu ümumi hesabda keçmək mümkün olmayıb – 3:4. “Tiraspol” adı ilə ilk avrokubok matçı da uğursuz olub. Komanda Tiraspolda Çexiya “Sinot”u ilə qolsuz heç-heçə etsə də, cavab görüşündə 0:4 hesabı ilə yenilib. 2006-cı ildə bürünc mükafatçı kimi İntertoto Kubokunda “MKT-Araz” və “Lex”i keçən “Tiraspol”u “Avstriyanın “Rid” klubu dayandırıb.

Komanda 2013-cü ildə 3-cü Moldova kubokunu baş məşqçi Vlad Qoyanın rəhbərliyi altında qazanıb. 43 yaşlı çalışdırıcı 2011-ci il yanvarın 1-dən “Tiraspol”u çalışdırır. Moldova təmsilçisində çoxlu sayda legionerlər çıxış edir. Bunlar ispaniyalı Erik Barroso, bolqarıstanlılar - Dimitar Petkov, Georgi Karaneyçev, Georgi Georgiyev, ukraynalılar – Yevgeni Zariçnyuk, Sergey Şapoval, rumıniyalılar – Boqdan Hauşi, erməni Artyom Xaçaturov, monteneqrolu Marko Vidoviç, latviyalı Anton Yemelyin və gürcüstanlı Laşa Japaridzedir. Əslində Ermənistan yığmasının üzvü olan Xaçaturov Moldovada doğulub. Ancaq 22 yaşlı müdafiəçi doğulduğu və yaşadığı ölkəyə xəyanət edib Ermənistanda çıxış etməyə üstünlük verib.

Ötən mövsüm 2-ci dəfə gümüş medalları qazanan “Tiraspol” təmsil etdiyi şəhərin digər komandası olan “Şerif”in stadionunda ev oyunlarını keçirir. Bu stadion 13300 tamaşaçı tutumuna malikdir.