Antalyada qış təlim-məşq toplanışında olan "Simurq" ötən gün hazırlıq proqramına əsasən iki məşqə çıxıb. Apasport.az-ın klubun rəsmi saytına istinadən verdiyi məlumata görə, əhər məşqindən öncə baş məşqçi Georgi Çixradze bütün futbolçuları ətrafına yığaraq Azərbaycan xalqının hüzn günü olduğunu bildirib və qeyd edib ki, 1990-cı il yanvarın 19-dan 20-nə keçən gecə sovet ordusu Bakı şəhərinə daxil olaraq, dinc əhalini vəhşicəsinə gülləbaran edib.
Bundan sonra bir dəqiqəlik sükutla şəhidlərimizin xatirəsi yad edilib.
Səhər məşqi qaçış və isinmə hərəkətləri ilə başlayıb. Fiziki hazırlıq üzrə məşqçi Aleksandar Karakliçin rəhbərliyi altında fiziki gücün artırılmasından ibarət tapşırıqlar yerinə yetirildikdən sonra futbolçular iki qrupa bölünüb və baş məşqçinin tapşırığı əsasında taktiki tapşırıqlar yerinə yetirilib. Çalışmalarda ayaqlarında yüngü ağrılar hiss edən Marko Stanoyeviç və Əli Gökdəmir iştirak etməyib.
Yerli vaxtla saat 17:00-da start götürən axşam məşqində isə bütün oyunçular iştirak edib. Qaçış və isinmə hərəkətlərindən sonra üç qrupa bölünərək "kvadrat" oynanılıb. Çalışmanın növbəti hissəsində isə səhər məşqində verilən taktiki tapşırıqların həyata keçirilməsindən ibarət ikitərəfli oyun keçirilib. Bundan sonra çalışmalar tamamlanaraq futbolçular istirahətə yollanıb.
Qeyd edək ki, "Simurq" bu gün Antalya toplanışı çərçivəsində növbəti yoldaşlıq görüşünə çıxacaq. Komanda Bakı vaxtı ilə saat 18:00-da Rumıniyanın "Astra" klubu ilə qarşılaşcaq. Görüş Antalyanın Lara bölgəsində yerləşən "Mirakle İdman Mərkəzi"nin stadionunda keçiriləcək.
Oxşar xəbərlər
Ana səhifə
Bütün xəbərlər