Topaz Premyer Liqasının XXVIII turunun arxada qalan oyunları bəzi məqamlara aydınlıq gətirib. Apasport.az saytının məlumatına görə, ilk növbədə çempionluq yarışından qopan komandaların sayı artıb.
Belə ki, “Sumqayıt”, “Rəvan” və AZAL-ın ardından “Xəzər Lənkəran”ın da qızıl arzusu rəsmən növbəti mövsümədək təxirə salınıb. Dünən “Qəbələ”ni məğlub edən “Qarabağ”la xal fərqinin 27-yə çatması, cənubluların ən yüksək əyarlı mükafatdan rəsmən uzaq düşməsi ilə nəticələnib. Eyni zamanda, “Qarabağ” mövsümü ən pis halda 6-cı başa vuracaq.
Ağdam təmsilçisinin digər 5 izləyicisi – “Neftçi”, “Bakı”, “İnter”, “Qəbələ” və “Simurq” hələ də ən azı kağız üzərində çempion ola bilər. Eyni zamanda, “Neftçi” ən pis halda 7-ci, “Bakı”, “İnter”, “Qəbələ” 8-ci olacaq. “Simurq”un isə hələ sonuncu olmaq təhlükəsi qalıb.
Bu isə o deməkdir ki, “Sumqayıt” da, “Rəvan” da bütün görüşlərini udmaq və digər nəticələr ümid etməklə 6-cı olmaq ümidi ilə yaşaya bilər.
Avrokuboklar iddiası sönməkdə olan AZAL-ın gümüşlə də vidalaşmasına gətirib çıxarıb. İndi “təyyarəçilər” nə qədər yüksəkdən uçsa da, bürüncdən artığına ümid edə bilər. Bu gün “İnter” “Rəvan”ı məğlub edərsə, AZAL üçün 3-cü yer də möcüzələrdən asılı olacaq. Çünki bunun üçün Tərlan Əhmədovun komandası 8 qələbə qazanmalı, “Bakı” ilə “İnter” öz aralarında heç-heçə edib, yerdə qalan görüşləri uduzmalı, amma paytaxt təmsilçilərindən heç olmasa biri “Qəbələ”dən də 1 xal qoparmalıdır.
Təbii ki, sonuncular da daxil olmaqla, yerdə qalan klubların münasib nəticələr əldə etməsi də vacibdir.
Oxşar xəbərlər
Ana səhifə
Bütün xəbərlər