Topaz Premyer Liqasında 2015/16 mövsümünün başlama vaxtı məlum olub. Bu barədə apasport.az saytına Peşəkar Futbol Liqasının prezidenti Ramin Musayev məlumat verib.
O bildirib ki, yeni mövsümün startı avqustun ikinci həftəsində veriləcək. Birinci turun oyunlarının avqustun 8-9-da keçirilməsi planlaşdırılır. Çempionatın püşkatması isə iyulun üçüncü həftəsində, daha da konkretləşdirsək, 15-20-si aralığında olacaq.
Yeni mövsümün başlamasına cəmi bir ay vaxt qalmasına baxmayaraq, “Simurq” hələ də təlim-məşq toplanışına yığışmayıb. Aparıcı futbolçularının hamısı və məşqçilər korpusu ilə yollarını ayıran Zaqatala təmsilçisinin elitada iştirakı sual altına düşüb. Hətta yayılan söz-söhbətə görə, “Simurq”u Premyer Liqada “Bakı” əvəz edəcək.
Ancaq Ramin Musayev bunun baş tutmayacağını söyləyib. O qeyd edib ki, “Simurq”, eləcə də ciddi maliyyə problemi ilə üzləşən AZAL 2015/16 mövsümünü də Premyer Liqada keçirəcək: “O ki qaldı “Bakı”ya, bu klubun Azərbaycan futboluna böyük xidmətləri olub. Ancaq qanun hamı üçün eynidi. “Bakı” Premyer Liqanı tərk etdiyindən, gələn mövsüm I divizionda iştirak etməli olacaq”.
Oxşar xəbərlər
Ana səhifə
Bütün xəbərlər