Topaz Premyer Liqasının VIII turunun mərkəzi oyununu Rəvan Həmzəzadə idarə edəcək. Apasport.az saytının məlumatına görə, çempionatın liderləri “İnter”lə “Qəbələ”nin qarşılaşması gənc referinin mövsümdə 3-cü matçı olacaq.
Bunadək cəmi 2 dəfə baş hakim kimi Premyer Liqa qarşılaşmasına çıxan Həmzəzadənin idarə etdiyi matçlarda eyni hesab qeydə alınıb. Belə ki, hər iki matçda qonaqlar 2:0 hesabı ilə qələbə qazanıb.
I turda “Qarabağ” Sumqayıtda, VI turda isə “Qəbələ” Zirədə eyniadlı meydan sahibini iki cavabsız qolla məğlub edib. Artıq Həmzəzadə ilə bir dəfə qalib gələn “qırmızı-qaralar” ikinci dəfə bu hakimin idarəçiliyi ilə səfər matçına çıxacaq.
Bu hakim iki qarşılaşmada cəmi 4 vərəqə göstərib. İlk matçı cəzasız başa vuran referi Zirədə meydan sahiblərinə 1, qonaqlara 3 xəbərdarlıq edib.