Topaz Premyer Liqasının XXVIII turunda “Rəvan”la qarşılaşan “Neftçi” mövsümdə 11-ci məğlubiyyətini alıb. Apasport.az saytının məlumatına görə, bununla, paytaxt təmsilçisi antirekordunu yeniləyib.
Belə ki, ölkənin ən titullu klubu çıxış etdiyi Azərbaycan çempionatlarında heç vaxt eyni mövsümdə 11 dəfə uduzmamışdı. Düzdü, 1993/94 mövsümünün turnir cədvəlində bakılıların hesabında 12 yenilgi əks olunub. Amma bu, heç də “Neftçi”nin məğlub olması sayəsində gerçəkləşməyib. 22 qarşılaşmada 4 dəfə uduzan “ağ-qaralar” çempionatda iştirakdan imtina etdiyi üçün son 8 görüşdə texniki məğlubiyyət alıb. Hətta həmin vaxt narazılar fərqli çempionat da təşkil etmək istəyinə də düşmüşdü.
Həmin qeyri-adi halı nəzərə almasaq, paytaxt təmsilçisi ən pis halda 10 dəfə uduzmuşdu. Bu da 2013/14 mövsümündə qeydə alınıb. Həmin vaxt 36 görüşdə 10 dəfə xalsız qalan “ağ-qaralar” sonda 4-cü olmuşdu.
Bundan başqa, “Neftçi”nin 9 məğlubiyyətlə bitirdiyi mövsümlər də olub. 1997/98 mövsümündə 26 matçda 9 dəfə uduzan Bakı klubu 6-cı olmuşdu. 2011/12 mövsümündə isə 32 görüşdə alınan 9 məğlubiyyət çempionluq tituluna mane olmamışdı. Paytaxt təmsilçisi ötən çempionatda da 32 qarşılaşmadan 9-da xalsız qalmışdı.
Cari mövsümdə sona 8 tur qalmış məğlubiyyət sayında antirekorda imza atan bakılılar nəticəsini daha da pisləşdirə də bilər. Çünki sonuncu dövrədə “Neftçi” yalnız autsayderlə qarşılaşıb və digər klublarla oyunlar qalıb.
Oxşar xəbərlər
Ana səhifə
Bütün xəbərlər
Hesabım