Portuqaliya millisinin və İspaniyanın “Real” klubunun futbolçuları Kriştianu Ronaldo və Pepe 44 gündə 2-ci dəfə qitə miqyaslı turnirin finalında kuboka sahib olub. Apasport.az saytının məlumatına görə, “Qızıl cütlük” mayın 28-də klubun heyətində Çempionlar Liqasının qalibi olmuşdusa, dünən yığma ilə Avropa çempionu tituluna yiyələnib.
Ronaldo-Pepe cütlüyü eyni ildə Çempionlar Liqası və Avropa çempionatının finalında meydana çıxıb, qələbə qazanan futbolçuların sayını 9-a çatdırıb.
Belə ki, AÇ-nin 56 illik tarixində bunadək yalnız 7 futbolçu eyni ildə “Qızıl dubl” müəllifi olmuşdu. 1964-cü ildə Luis Suares İtaliya “İnter”i ilə ÇL, İspaniya millisi ilə AÇ-ni qazanmaqla ilkə imza atımışdı. 24 ildən sonra Hollandiya yığması və PSV-nin “dördlüy”ü – Ronald Kuman, Berri van Arle, Hans van Brekelen, Harald Vanenburq iki finalda qələbə sevinci yaşayıb.
Portuqaliyalılara qədər eyni uğura imza atan sonuncu oyunçular ispaniyalılar olub. 2012-ci ildə Xuan Mata ilə Fernando Torres “Çelsi” ilə ÇL, milli ilə AÇ-nin finalında qələbə qazanıb.
Düzdü, daha 3 futbolçu eyni ildə bu iki turnirin qalibi ola bilib. Amma onlara hər iki finalda meydana çıxmaq nəsib olmayıb. 1988-ci ildə Vim Kift (Hollandiya yığması və PSV), 2000-ci ildə Nikola Anelka və Kristian Karambö (Fransa yığması və “Real”) həm klub, həm yığmada qitənin ən yaxşısı olub. Sonuncu hər iki, digər ikisi isə yığmadakı finalı ehtiyat oyunçular skamyasından izləyib.
Oxşar xəbərlər
Ana səhifə
Bütün xəbərlər
Hesabım