Fransada keçiriləcək Avropa çempionatının startına 24 gün qalıb. Apasport.az saytı qitənin ən nüfuzlu turnirinin iştirakçılarının təqdimatını D qrupunda yer alan İspaniya ilə davam etdirir.
Püşkatmada 1-ci səbətdə yer alan pireneylilər Fransaya titulunu qorumaq üçün yollanacaq. Ardıcıl 2 dəfə qitə çempionu olan “qırmızılar” növbəti tituluna iddialıdı. Almaniya ilə eyni sayda Avropa çempionluğu olan İspaniya ümumilikdə 4-cü belə zəfəri gözləyir.
Düzdü, Xavili, İnyestalı futbolçu nəsli tükənməkdə olan pireneylilər əvvəlki qədər əzəmətli görünmür. Buna da səbəb Avropanın aparıcı klubları “Real”la “Barselona”da aparıcı rollarda legionerlərin olmasıdı. Ən yaxşı ispan futbolçular isə müdafiə və dayaq yarımmüdafiəsi mövqeyində çıxış edir. Bir sözlə, yığmanın hücum xətti əvvəlki qədər təhlükəli deyil.
Seçmə mərhələdə ciddi çətinlik çəkməyən ispaniyalılar yalnız startda məğlub olub. Lakin Slovakiyaya yenilgi daha çox arxayınlığın nəticəsi idi. O qədər də güclü olmayan rəqiblərlə qarşılaşmalarda qələbələri sıralayan pireneylilər tsikli 1-ci pillədə başa vurublar. Son Avropa çempionları ardıcıl 8 quru oyun keçirməklə də diqqət çəkib. İlk iki matçda qol buraxandan sonra onların qapısına yol tapan olmayıb.
Qapıda hələ də İker Kasilyasa güvənən del Boskenin sərəncamında David de Xea da var. Müdafiə xətti sabit olan İspaniya yığmasının sağ cinahda Xuanfran, solda isə Xordi Albaya güvənir. 4-3-3 sxeminə uyğun olan hər iki müdafiəçi hücumlara qoşulmağı yaxşı bacarır. Müdafiənin mərkəzi isə Xerard Pike və Serxio Ramos çıxış edir. Bu cütlük dünyanın ən yaxşı mərkəz müdafiəçiləri tandemi də sayılır.
Yarımmüdafiədəki “üçlüy”ü təxmin etmək isə çətindi. Sesk Fabreqasın hansı formada olacağı, David Silvadan necə yararlanılacağı orta sahə ilə bağlı suallar yaradır. Sağ cinahda zədədən sonra bərpa prosesi keçən Santi Kasorla da var. Dünyanın ən yaxşı dayaq yarımmüdafiəçilərindən biri Serxio Buskets və onun solunda yer alan Andres İnyestanın da heyətdə olacağı şübhə doğurmur. Lakin sonuncunu İsko və Koke də əvəzləyə bilər.
Hücum xəttində Dieqo Kostanın formasından çox şey asılıdı. Onun mərkəzdə yer alacağı, cinahlarda isə Pedro ilə Paok Alkaserin dəstək verəcəyi mümkündü. Lakin Fernando Torres və Alvaro Morata da hücumu gücləndirmək iqtidarında olan futbolçulardı.
İspaniya yığmasının qrupdan asanlıqla çıxacağı gözlənilir. Düzdü, del Boskenin yetirmələri son matçlarda qələbə qazan bilmir. Bu il baş tutan yoxlama matçlarında İtaliya (1:1) və Rumıniya (0:0) ilə heç-heçə qeydə alınıb.
FİFA reytinqində: 6-cı yer
Ləqəbi: Qırmızılar, qırmızı furiya, buğalar
İlk oyun: Danimarka – 1:0 (1920)
Ən böyükhesablı qələbə: Bolqarıstan – 13:0 (1933)
Ən böyükhesablı məğlubiyyət: İtaliya – 1:7 (1928), İngiltərə - 1:7 (1931)
Titulları: Dünya çempionu (2010), Avropa çempionu (1964, 2008, 2012), Olimpiya çempionu (1992)
Ən çox oyun: İker Kasilyas (166)
Ən çox qol: David Vilya (59)
Final mərhələsinə yolu:
C qrupunda I yer: 9 qələbə, 1 məğlubiyyət, top fərqi 23-3, 27 xal
Slovakiya - 2:0*, 1:2
Ukrayna – 1:0, 1:0
Belarus – 3:0, 1:0
Lüksemburq – 4:0, 4:0
Makedoniya – 5:1, 1:0
* - əvvəl ev, sonra səfər oyunu
Əvvəlki Avropa çempionatlarında:
1960 – imtina edib
1964 – Çempion
1968 – Final mərhələsinə yüksələ bilməyib
1972 – Final mərhələsinə yüksələ bilməyib
1976 – Final mərhələsinə yüksələ bilməyib
1980 – Qrup mərhələsi
1984 – II yer
1988 – Qrup mərhələsi
1992 – final mərhələsinə yüksələ bilməyib
1996 – 1/4 final
2000 – 1/4 final
2004 – Qrup mərhələsi
2008 – Çempion
2012 – Çempion
Baş məşqçi: Visente del Boske
Kapitan: İker Kasilyas
AVRO-2016-da oyunları:
13 iyun. 17:00. İspaniya – Çexiya
17 iyun. 23:00. İspaniya – Türkiyə
21 iyun. 23:00. Xorvatiya – İspaniya