[b]AFFA Reynaldonu milliləşdirsə...[/b]

05.09.2014 - 15:13

AFFA-nın milliləşdirmək istədiyi “Qarabağ”ın legioneri Reynaldo yığmamızda 6-cı braziliyalı ola bilər. Apasport.az saytının məlumatına görə, 25 yaşlı hücumçuyadək millimizdə onun 5 həmyerlisi oynayıb.

Azərbaycan millisinin ilk braziliyalıları 2006-cı ildə Şahin Diniyevin yığmamızı çalışdırdığı vaxt komandaya cəlb olunub. Ümumiyyətlə, 5 braziliyalıdan 4-ü məhz onun baş məşqçiliyi dövründə milliləşib. Yalnız Fabio Luis Ramim sonradan yığmaya çağırılıb. Onu məhz yığmamızın indiki çalışdırıcısı Berti Foqtsun istəyi ilə milliləşdiriblər.

“Sambaçılar” yığmamızda üst-üstə 59 oyun keçirib, 5 qol vurublar. Oyun sayında Leandro Qomeş rekordçudu – 18. Fabio Luis Ramim isə daha çox qol vurub – 4 dəfə. İlk qol vuran braziliyalım isə Andre Ladaqa olub.