Albaniya millisinin futbolçusu Ansi Aqolli AVRO-2016-nın Serbiyaya qarşı keçirilən seçmə matçında baş verən insidentə münasibət bildirib. Apasport.az saytının xəbərinə görə, Ağdamın "Qarabağ" klubunun da müdafiəçisi olan Aqolli deyib ki, serbiyalı futbolçular Albaniyanın bayrağını cırmaq istəyiblər:
"Bunun qarşısını almaq üçün bayrağı onların əlindən aldıq. Məncə, düzgün hərəkət etdik. Kim olsa, bayrağı üçün eyni şeyi edərdi. Bayrağımızı qorumağa çalışdıq. İnsident zamanı mən heç kəsi vurmadım. Ancaq rəqib komandanın futbolçuları mənə bir neçə dəfə yumruq atdı. Baş verənlərə hələ də inana bilmirəm".
Aqolli qarşılaşmadan əvvəl serblərin onlara qarşı hörmətsizlik etdiyini də iddia edib: "Azarkeşlərin səsindən Albaniya millisinin dövlət himnini eşidə bilmədim. Qarşılaşma başladığı zaman isə onlar əllərində olanları bizə tulladılar".
Futbolçu bundan əvvəl İrəvanda keçirilən Ermənistan - Serbiya görüşündə erməni azarkeşlərin açdığı "Qarabağ Ermənistanın, Kosova isə Serbiyanındır" pankart haqda da danışıb. O deyib ki, hər kəs Qarabağ və Kosovanın kimin olduğunu çox gözəl bilir: "Dünya Qarabağı Azərbaycan torpağı, Kosovanı isə müstəqil ölkə kimi tanıyır".
Xatırladaq ki, Serbiya – Albaniya matçının 42-ci dəqiqəsində pilotsuz helikopterlə 2008-ci ildə Serbiyadan ayrılan Kosovanın da əhatə olunduğu xəritənin yer aldığı Albaniya bayrağı meydançaya endirilib. Bundan sonra iki komandanın futbolçuları arasında gərginlik yaşanıb. Bu səbəbdən matçın baş hakimi Martin Atkinson oyunun yarımçıq dayandırıb (sportal.az).
Oxşar xəbərlər
Ana səhifə
Bütün xəbərlər
Hesabım