[b]Bakıda türk dueli, Qəbələdə Qurbanovlar üz-üzə[/b]

12.12.2014 - 15:55

Sabah Topaz Premyer Liqasında XVI turun oyunları keçiriləcək. Apasport.az saytının məlumatına görə, iki gün davam edəcək turun iki oyunu Bakıda, ikisi paytaxtdan kənarda baş tutacaq.

İlk oyun günündə “Simurq”la “İnter” üz-üzə gələcək. Ardıcıl 3 qələbə qazanan bakılılar son iki oyunda xala həsrət qalan meydan sahiblərini məğlub edib, 2-ci pilləni qorumağa çalışacaq. 6 turdu qol vuran zaqatalalılar isə mövqeyini yaxşılaşdırmağa çalışacaq.

Turun ikinci günü türk məşqçilərin dueli ilə başlayacaq. “Bakı” – “Xəzər Lənkəran” qarşılaşması İbrahim Uzunca ilə Oğuz Çətinin ikinci görüşü olacaq. Ardıcıl 8 matçda qol sevinci yaşayan cənublular autsayderi də itkisiz keçməyə çalışacaq.

Qəbələdəki qarşılaşma Sənan Qurbanovun eyniadlı komandanın “sükanı arxasında” debütü ilə əlamətdar olacaq. 5 oyundu qələbə qazana bilməyən meydan sahibləri seriyanı “Qarabağ”la matçda qırmaq əzmindədi. Qurban Qurbanov isə gənc həmsoyadının debütünü korlamaq, bununla da zirvədəki yerini möhkəmlətmək niyyətindədi.

Tura “Neftçi” və “Sumqayıt” arasında oyunla yekun vurulacaq. Ardıcıl 3 heç-heççədən sonra liderdən uzaq düşən bakılılar seriyanı qələbə ilə qırmaq niyyətindədi. Sumqayıtlılar isə son sıralardan daha da uzaqlaşmaq üçün səfərdə uduzmamalıdı.

XVI tur

13 dekabr (şənbə)

17:00. “Simurq” – “İnter”

I dövrədəki oyun – 0:0
Hakimlər: Orxan Məmmədov, Mehman Mahmudov, Munis Abdullayev, Əliyar Ağayev
Zaqatala şəhər stadionu

14 dekabr (bazar)

14:00. “Bakı” – “Xəzər Lənkəran”
I dövrədəki oyun – 0:4
Hakimlər: Vüsal V. Əliyev, Namiq Hüseynov, Coşqun Həsənov, Elvin Əsgərov
“Bakı” FK-nın təlim-məşq bazasının stadionu

15:00. “Qəbələ” – “Qarabağ”
I dövrədəki oyun – 0:2
Hakimlər: Fariz Yusifov, Yaşar Abbasov, Nahid Əliyev, Rəhim Həsənov
Qəbələ şəhər stadionu

17:00. “Neftçi” – “Sumqayıt”
I dövrədəki oyun – 1:0
Hakimlər: Ramil Diniyev, Mübariz Haşımov, İsgəndər Əliyev, Ramil Əhmədov
“Bakcell Arena”

N	KLUBLAR	O	Q	H	M	T-F	X
1	Qarabağ	13	8	4	1	23-13	28
2	İnter	13	6	6	1	22-4	24
3	Neftçi	13	6	5	2	15-8	23
4	Xəzər Lənkəran	13	5	3	5	19-16	18
5	Simurq	14	5	2	7	19-19	17
6	Qəbələ	13	3	5	5	15-21	14
7	Sumqayıt	13	4	2	7	16-21	14
8	AZAL	13	3	4	6	14-23	13
9	Bakı	13	2	3	8	10-28	9