“Baş məşqçinin burda ciddi dəyişikliklər etdiyini gördüm. Onunla “Preuzen Münster”də birlikdə çalışmaq imkanım olub. Pavel Dolçevin oyun fəlsəfəsi tam ürəyimcədi”. Apasport.az saytının məlumatına görə, bunu Bundesliqa II klubu “Aue”yə yeni transfer edilən Azərbaycan yığmasının yarımmüdafiəçisi Dmitri Nazarov deyib.
Hazırda yeni komandası ilə birlikdə təlim-məşq toplanışında olan təcrübəli futbolçu Almaniya mətbuatına açıqlamasında “Aue”yə kömək etmək iqtidarında olduğunu söyləyib: “Erzberq şəhəri haqda çox az məlumatım var idi. Təlim-məşq toplanışından sonra hər yeri gəzəcəm. Eyni zamanda özümə və sevgilimə yeni ev axtaracam. “Karlsrue”də 3 il ərzində topladığım təcrübə mənə çox kömək olacaq. İnanıram ki, bu təcrübəm yeni gənc komandama da fayda verəcək. Son vaxtlar mərkəz yarımmüdafiəçisi mövqeyində çıxış edirəm. Baş məşqçi mənim nəyə qadir olduğumu çox yaxşı bilir. Əminəm ki, o, məni ən doğru mövqedə oynadacaq”.
“Aue” klubu ötən mövsüm Bundesliqa III-də ikinci yeri tutaraq Bundesliqa II-də oynamaq imkanı əldə edib. Nazarov isə komandasının bu çempionatda möhkəmlənəcəyini düşünür: “Burda rəqabət çox güclüdü. Bu çempionata “Hannover” və “Ştutqart” kimi daha iki komanda əlavə olundu. Hansı ki, onlar uzun müddət çox yaxşı formada olublar. Buna baxmayaraq, “Aue” də çox keyfiyyətli komandadı. Bu klub Bundesliqa II-də debüt etməsinə baxmayaraq, yerini möhkəmlətməyi bacaracaq. Bunun üçün bir kollektiv kimi fəaliyyət göstərməliyik. Bundesliqa II-də hətta sonuncu pillələrində gedən komanda da özünü yaxşı tərəfdən göstərməyi bacarır”.
“Aue” klubunun baş məşqçisi Pavel Dolçev də 26 yaşlı futbolçu haqda fikirlərini bildirib. Bolqarıstanlı mütəxəssis Nazarovu Almaniya yığmasının aparıcı oyunçularından olan Tomas Müllerlə müqayisə edib: “Dmitri ilə daim əlaqədə idim. Onun 2-ci liqa təmsilçisi “Fortuna” ilə danışıqlar apardığını da bilirdim. Bir gün onunla telefon danışığı çox gözəl alındı və keçid baş tutdu. Hadisələr çox sürətlə cərəyan etdi. Nazarov oyun üslubuna görə Tomas Mülleri xatırladır. Onun hərəkətləri və son zərbələri bəzən qeyri-adi və qeyri-ənənəvi görünür. Nazarov hər zaman meydanda fərq yaratmağı bacarır”.
Qeyd edək ki, 2014-cü ildən Azərbaycan yığmasının formasını geyinən Dmitri Nazarov bu yaxınlarda “Aue” ilə 2 illik müqavilə imzalayıb.
Oxşar xəbərlər
Ana səhifə
Bütün xəbərlər
Hesabım