Çempionlar Liqasının qrup mərhələsinin tamaşaçı sayı ilə bağlı göstəriciləri açıqlanıb. Apasport.az saytının məlumatına görə, arxada qalan 5 turda baş tutan 80 qarşılaşmanı 3 milyon 440 min 699 tamaşaçı izləyib.

Orta hesabla hər matçda 43 min 9 nəfər qeydə alınıb. Qitənin ən nüfuzlu klub turnirində çıxış edən 32 komandadan 16-sı üç, 16-sı iki ev oyunu keçirib.

Düzdü, tamaşaçı sayı nisbi anlayışdı və stadionların tutumu, göstəricinin hansı yolla əldə olunması həlledici amillərdəndi. Amma klubların orta tamaşaçı sayı yenə böyük maraq doğurur. Bu göstəricilərə nəzər salsaq, “Tottenhem” Çempionlar Liqasının 1-cisidi. İngiltərə klubunun hər ev matçına orta hesabla 75 mindən çox seyrçi toplaşır.

Digər İngiltərə klubu “Mançester Yunayted” liderdən 1417 azarkeş geri qalır. 3-cü olan “Real” və “dördlük”də yer alan “Bavariya” da 70 min həddini adlayıb. Lakin liderlərin hamısı öz meydanında iki oyun keçirdiyindən son turda hər şey dəyişə bilər.

Azərbaycan çempionu “Qarabağ” turnirin əsas mərhələsinin debütantı olsa da, ön sıralarda yer alıb. Təmsilçimiz Bakı Olimpiya Stadionunda keçirdiyi 3 qarşılaşmada tribunalara 182 min 223 tamaşaçı toplamağa müvəffəq olub. Bu da orta hesabla hər matçda 60 min 741 seyrçi deməkdi.

“Qarabağ” bu göstərici ilə Çempionlar Liqasında 7-cidi. 70 mini keçən 4 liderdən başqa “Barselona” və Dortmund “Borussiya”sı da Ağdam klubundan öndə qərarlaşıb.

Çempionlar Liqasının 7-cisi olan “Qarabağ” digər nəhəngləri qabaqlayır. Ağdam klubu həm də çıxış etdiyi C qrupunda hamını qabaqlayır. “Atletiko”, “Çelsi” və “Roma” siyahıda çempionumuza aşağıdan yuxarı baxmaq məcburiyyətindədi.

Qeyd edək ki, cədvəlin sonuncu pilləsində “Monako” yer alıb.