[b]Kamran Ağayevin yumruğu cavabsız qalmadı [/b]

24.12.2014 - 15:56

Topaz Premyer Liqasının XVIII turunun “Qəbələ” – “İnter” matçında baş verənlər yenidən müzakirə olunub. Apasport.az saytının məlumatına görə, əsas müzakirə mövzusu meydan sahiblərinin və millimizin qapıçısı Kamran Ağayevin hərəkəti olub.

Oyunun 79-cu dəqiqəsində rəqibə bilərəkdən zərbə endirən qolkiperin hərəkəti hakimin gözündən yayınsa da, AFFA bu məsələyə baxmağı lazım bilib. Matçın videoyazısını izlədikdən sonra İntizam Komitəsi Ağayevi 3 oyun cəzalandırıb. “Qəbələ” isə qapıçısına görə 3000 manat cərimə olunub.

Hakimlər Komitəsinə ədalət təmsilçiləri ilə bağlı lazımi tədbirlər görüb İntizam Komitəsinə məlumatlandırmaq tapşırığı verilib.

Bundan başqa, meydan sahibləri 4 futbolçusu sarı vərəqə ilə cəzalandığı üçün 1000, qonaqlar isə Elvin Məmmədovun qırmızı vərəqəsi üçün 200 manat cərimə edilib. Yarımmüdafiəçinin özü 1 oyunluq cəza da alıb.

“Bakı” – AZAL matçında meydan sahiblərinin 4 futbolçusu sarı vərəqə ilə cəzalandığı üçün klub 1000 manat cərimə olunub.

“Qarabağ”la oyunda 4 futbolçusuna xəbərdarlıq edilən “Xəzər Lənkəran”ın da cəzası eynidi. Cənublular azarkeşləri tərəfindən meydançaya kənar əşya atıldığına görə daha 2000 manat ödəməli olacaq.

“Sumqayıt” – “Qəbələ” görüşündə meydan sahibləri 5 futbolçusu sarı vərəqə alması üçün 1000, 89-cu dəqiqədə azarkeşləri tərəfindən meydançaya kənar əşya atıldığına görə isə 2000 manat ziyana düşüb.

“İnter” – “Neftçi” matçında 6 sarı vərəqə alan qonaqlar da 1000 manat ödəyəcək.