Bu gün keçiriləcək Avropa Liqasının qrup mərhələsinin I turunda qazanılacaq ilk qələbə Azərbaycan klubları üçün tarixi əhəmiyyət kəsb edəcək. Apasport.az saytının məlumatına görə, meydana çıxacaq “Qarabağ” və “Qəbələ”nin əldə edəcəyi ilk uğur ölkəmiz üçün avrokuboklarda 75-ci qələbə olacaq.

Belə ki, 1994-cü ildə qitə kuboklarında debüt edən təmsilçilərimiz indiyədək 74 qələbə qazanıb. Bu, 270 matçda mümkün olub.

Digər qarşılaşmalarda isə 70 heç-heçə qeydə alınıb. Komandalarımız 126 dəfə uduzub.

Bundan başqa, qazanılacaq qələbə cari mövsüm 10-cu olacaq. Belə nəticə isə mütləq rekorddu. İndiyədək klublarımız bir mövsümdə 9-dan artıq qələbə qazana bilməyib. Klublarımız 2014/15 və 2016/17 mövsümlərində 9 dəfə seviniblər.

Qeyd edək ki, “Qarabağ” Çexiyanın “Slovan”, “Qəbələ” Belçikanın “Anderlext” klubu ilə görüşəcək. Daha tez və evdə oynayan ağdamlılar yubiley qələbəsinin müəllifi olmaq üçün daha şanslıdı.