AFFA-nın bu gün keçirilən İntizam Komitəsinin iclasında son 1 həftədə ölkə futbolunda yaşanan xoşagəlməz hadisələrə hüquqi qiymət verilib. Apasport.az saytının məlumatına görə, müxtəlif liqalarda hakimlərə, rəqibinə və azarkeşlərə qarşı qayda pozanlar ağır cəzalarını alıb.
I divizionda keçirilən “Lokomotiv” – “Şahdağ” matçının 85-ci dəqiqəsində meydan sahiblərinin futbolçusu Kənan Cəfərov azarkeşlərə qarşı qeyri-etik ifadələr işlətdiyinə görə birbaşa qırmızı vərəqə alıb. Bu üzdən də futbolçu 3 oyunluq cəza, komandası 200 manat cəriməyə layiq görülüb.
“Rəvan”ın üzvləri də “qəhrəmanlar” arasında olub. U-19-un oyunçusu Anar Həsənov AZAL-la oyunda rəqibi təhqir edib. Ona da 3 oyunluq cəza verilib. U-13-ün “Neftçi” ilə qarşılaşmasında hakimi söyən Seyxan Fərəcov 4, aqressiv oyuna görə qırmızı alan Ülvi Heydərli 2 matçlıq cəza alıb. Komandanın baş məşqçisinin hakimi söyməsi isə 5 oyunluq cəza ilə nəticələnib. Lakin Hakimlər Komitəsinə də matçın idarəçiliyini araşdırıb lazımi tədbir görməsi tapşırılıb.
U-16 Liqasında keçirilən “Neftçi” – “Simurq” görüşündə isə Sərxan Əhmədli ilə Firudin Mövsümov bir-birlərinə qarşı aqressiv davranıb. Onların hər ikisi 4 turluq istirahət qazanıb.
U-11 Liqasının “İnter” – TİM (Gəncə) matçında isə “Kəpəz”lə dəfələrlə Azərbaycan çempionatlarının mükafatını qazanmış futbol veteranı Ceyhun Tanrıverdiyev fərqlənib. Gəncə təmsilçisinin baş məşqçisi hakimləri təhqir etidiyi üçün 5 oyun komandasının yanında olmayacaq.
Ən ağır cəza isə həvəskarlardan ibarət “Bunə” komandasının futbolçusu Əlfəddin Vəliyevə verilib. “Naftalan”la görüşündə hakimi vuran oyunçu 10 matçlıq cəza alıb.
Oxşar xəbərlər
Ana səhifə
Bütün xəbərlər