[b]Azərbaycan kuboku: Kim qalib gələcək?[/b]

02.12.2014 - 00:00

Sabah Azərbaycan kubokunun 1/8 final mərhələsinə start veriləcək. Apasport.az saytının məlumatına görə, bir oyundan ibarət olacaq bu mərhələ çərçivəsində 7 qarşılaşma baş tutacaq.

Tura son kubokun qalibi “Neftçi”nin oyunu ilə start veriləcək. “Ağ-qaralar” I divizon təmsilçisi “Qaradağ Lökbatan”ı sınağa çəkəcək. Ölkə çempionatının son 3 oyundan yalnız 2 xal toplayan Arif Əsədovun yetirmələri bu görüşdə aşağı dəstə klubunu məğlub edib, azarkeşləri ilə barışmaq niyyətindədi.

“Neftçi” - “Qaradağ Lökbatan” matçı ilə eyni vaxtda AZAL səfərdə “Neftçala” ilə üz-üzə gələcək. Topaz Premyer Liqasının son turunda “Sumqayıt” üzərində qazanılan qələbəni nəzərə alsaq, “təyyarəçilər” bu görüşə yüksək əhval-ruhiyyədə çıxacaq.

Çempionatda işləri heç də yaxşı getməyən “Qəbələ” doğma publika önündə “Ağsu”nu qəbul edəcək. Bakıda “Neftçi”dən xal qoparan əyalət klubu evdə növbəti mərhələyə adlamağa çalışacaq.

“Sumqayıt” “Bakı” ilə münasibətlərinə aydınlıq gətirəcək. Son ölkə çempionu “Qarabağ” MOİK-lə, “Simurq” “Rəvan”la, “İnter” “Şahdağ”la qarşılaşacaq.

Qeyd edək ki, “Araz-Naxçıvan” yarışdan çıxdığı üçün “Xəzər Lənkəran” 1/8 finalda oynamadan mərhələ adlayıb.

3 dekabr (çərşənbə)

13:00. “Neftçi” – “Qaradağ Lökbatan”
İsmət Qayıbov adına Bakıxanov qəsəbə stadionu

13:00. “Neftçala” – AZAL
Nəriman Nərimanov adına Neftçala şəhər stadionu

15:00. “Qəbələ” – “Ağsu”
Qəbələ şəhər stadionu

15:00. “Sumqayıt” – “Bakı”
“Kapital Bank Arena”

15:30. “Qarabağ” – MOİK
Tofiq Bəhramov adına Respublika stadionu

17:00. “Simurq” – “Rəvan”
Zaqatala şəhər stadionu

18:00. “Şahdağ” – “İnter”
“İnter Arena” stadionu