Ukraynanın “Şaxtyor” futbol klubunun baş məşqçisi Mirça Luçesku qəribə təklif verib. Apasport.az saytının məlumatına görə, rumıniyalı baş məşqçi Ukrayna Premyer-Liqasındakı problemlərlə bağlı çempionatı dayandırmağı və Avropa kuboklarına yerləri ilk 6 yeri tutan komanda arasında keçirilən oyunlarla müəyyənləşdirməyi təklif edib.
Luçeskunun sözlərinə görə, təklifinə “Metallist” və “Çernomorets” klublarının yaşadığı maliyyə böhranı və Krım komandalarının qeyri-müəyyən taleyi səbəb olub: “Hansısa məqamda çempionatın ümumiyyətlə dayandırılmasını və avrokuboklardakı yerlərin ilk 6 komanda arasında sıfırdan başlayaraq öz aralarında keçirdikləri oyunların nəticəsinə uyğun bölüşdürülməsini təklif etmək istədim. Çünki gələn il yüksək liqadan kiminsə çıxacağını və ya qalacağını bilmirik… Qalanları öz aralarında oynasınlar. Bu zaman bizim güclü, tam dolmuş stadionlar şəraitində keçirilən maraqlı çempionatımız olardı. İndi isə biz bu həftədən digər həftəyə sürünürük. Azarkeşlərə cəmi 3-4 oyun maraqlıdır. Əsas problem kimin hücumda, kiminsə müdafiədə oynaması deyil, məhz budur. Biz çempionatımızı ümumilikdə gücləndirməliyik, onun imicinin beynəlxalq arenada qalxmasına çalışmalıyıq. Bu il avrokuboklardakı kimi olmamalıdır: komandalar idman prinsipinə görə deyil, hansısa digər səbəblərə görə turniri tərk edirdilər. Anormal çempionat alındı! Federasiya dərin analiz etməlidir. Mən bunu komandası birinci yerdə olan baş məşqçi kimi deyirəm. Əslində belə situasiya məni qane etməliydi. Amma qane etmir”.
Xatırladaq ki, hazırda Ukrayna Premyer-Liqasında ilk 6 yeri “Şaxtyor”, “Dnepr”, “Dinamo Kiyev”, “Metallist”, “Çernomorets” və “Vorskla” tutur.
Oxşar xəbərlər
Ana səhifə
Bütün xəbərlər