Dünya futbolunun canlı əfsanəsi Dieqo Maradona dünya çempionatının yarımfinal oyununda Braziliyanın Almaniya millisinə 1:7 hesabı ilə uduzmasını istehza ilə qarşılayıb. Apasport.az xəbər verir ki, Bundestimin çox gözəl oyun nümayiş etdirdiyini bildirən argentinalı meydan sahiblərini lağa qoyub.
“Almanların Braziliyaya 7 qol vurmasına mahnı bəstələmək lazımdı. Düşünürəm ki, argentinalı azarkeşlər braziliyalılar üçün mahnı yazacaqlar. Almaniya meydanda uşaqlara qarşı oynayırdı. Braziliya adlı komanda yox idi. 6-cı qoldan sonra oyunu dayandırmaq lazım idi. Almaniya millisi sanki tankdı. İstəyirəm ki, finalda Argentina onlarla oynasın. 1990-cı ildə mundialın həlledici matçında almanlara uduzmuşuq. Bunun qisasın almaq lazımdı” – deyə, Maradona bildirib.
Maradona braziliyalı futbolçuların məğlubiyyəti necə şərh edəcəyini anlamadığını deyib: “Başa düşmürəm ki, braziliyalı futbolçular məğlubiyyəti necə şərh edəcəklər? Özü də bu hesabla. Hələ Məsut Özil 8-ci qolu vura bilərdi. Onda daha dəhşətli olacaqdı”.
Maradona oyundan sonra qızının ona mesaj yazmasından və 4 il əvvəl Argentinanın da almanlara 0:4 hesabı ilə uduzmasından danışıb: “Oyundan sonra qızım mənə mesaj yazdı. Deyirdi ki, ata 4 il əvvəl siz Almaniyaya biabırçı hesabla uduzmadınız? Bunun cavabında heç nə deyə bilmədim. Yadımdadır, Cənubi Afrika Respublikasında keçirilən mundialda biz də onlara böyük hesabla məğlub olmuşduq”.
Oxşar xəbərlər
Ana səhifə
Bütün xəbərlər