“Püşkün nəticəsindən razı qaldım”. Apasport.az saytının məlumatına görə, bu sözləri “Mladost” klubunun baş məşqçisi Nenad Milovanoviç deyib.
Serbiya təmsilçisi Avropa Liqasının I təsnifat mərhələsində Bakı “İnter”i ilə üz-üzə gələcək.
Ölkəsinin mətbuatına açıqlama verən Milovanoviç püşkün nəticəsindən narazı olmadığını bildirib: “Digər potensial rəqiblərimizi nəzərə alaraq, püşkdən razıyam. Ümidlənməyə haqqımız var. “Mladost” özünü göstərməlidi”.
Milovanoviç futbolçularının “İnter”lə oyunlarda əllərindən gələni edəcəklərini bildirib: “Onu deyə bilərəm ki, komandamız mərhələ adlamaq üçün maksimum gücünü göstərəcək. Klubumuzu və Serbiya futbolunu dünyada layiqincə təmsil etmək istəyirik. Bunun üçün gücümüzün yetərli olub-olmadığını görəcəyik”.
Qeyd edək ki, “Mladost” və “İnter” arasındakı ilk görüş iyunun 29-da Serbiyada, cavab matçı isə iyulun 6-da Azərbaycanda keçiriləcək.
.