“İndiyəqədərki oyuna əsasən özümüzdən razı ola bilərik. Şimali İrlandiya ilə görüşün ilk dəqiqələrindən gücümüzü göstərdik, erkən qol vurduq”. Apasport.az saytı xəbər verir ki, bu sözləri Almaniya yığmasının baş məşqçisi Yoahim Löv deyib.

Bundestim DÇ-2018-in seçmə mərhələsi çərçivəsində son matçını Azərbaycan millisinə qarşı keçirəcək.

Matçdan öncə mətbuat konfransı keçirən Löv bunları deyib: “Bütün gücümüzü sabaha yönəltmişik. Qrupdakı 10-cu matçda da qələbə qazanmaq istəyirik. Sabah kimin oynayacağını dəqiq deyə bilmərəm. Amma qapıda Ter-Ştegen dayanacaq. Həmçinin Leroy Sane də start heyətində yer alacaq. Dünən komandaya bir az sərbəstlik verdim. Kimlərin sabah oynayacağına axşam qərar verəcəm. Əlbəttə ki, artıq Rusiyadakı dünya çempionatı barədə də düşünürük. Orda olmuşam, harda qalaq məsələsi ilə maraqlanmışam. Amma püşkatmadan da çox şey asılıdı. Dünya çempionatı üçün yeni strategiyaya ehtiyacımız var. Dünyanın ən güclü komandalarından biriyik. Futbolçular  arasındakı birlik cari seçmə mərhələdəki nəticələrdə öz sözünü dedi. Yəqin ki, Rusiyadakı mundial ən çətin turnirimiz olacaq. Hamı deyir ki, Almaniya qalib olmalıdı. Amma biz indidən bu barədə nəsə deyə bilmərik. Ümid edirəm ki, həmin yarışa qədər heç kim zədələnməsin, cəzalanmasın. Bütün futbolçular bu ərəfələrdə formada olmağa çalışmalıdılar. Bəzi mövqelər tam istədiyimiz kimi deyil. Onları düzəltməyə çalışacağıq. Azərbaycan autsayder komanda deyil. Onları dünya çempionatındakı komandalarla müqayisə etmək doğru deyil. Bu seçmə mərhələ bitdikdən sonra bizim əsl işimiz başlayacaq”.

- Dörd il öncəki dünya çempionatı ilə müqayisədə komadanın indiki durumu necədi?

- Biz həmişə formadayıq. İtaliya kimi qeyri-stabil deyilik. Bütün oyunlarda  konsentrasiya yüksək səviyyədə olur, futbolçuların fikirləri dağılmır. Hər futbolçu özünü hazırlamalı, bilməlidi ki, dünya çempionatı gəlir. Bu, bütün turnirlərdən vacib gəlir. Dünyada birinci pillədəyik. Çünki həmişə seçmə mərhələlərdə güclü çıxış etmişik. Amma gələn il necə olacaq, bunu deyə bilmərəm. Orda güclü komandalar olacaq. Hansı formada olacağımızı orda biləcəyik. Komandamızda bir səhv olsa belə, futbolçular dərhal onu sığortalayırlar. Onlar dünyanın birincisi olduqlarını hamıya göstərmək istəyirlər. Mundialla bağlı arzumuz böyükdü. Kifayət qədər gənc oyunçularımız var. Düşünməyin ki, ən yaxşılar Almaniyadadı. İtaliya və Fransada da güclü oyunçular mövcuddu. Dünya çempionu olsaq da, daim çalışırıq ki, dünəndən yaxşı olaq. Son 7-8 ildə üzərimizdə çox çalışdığımız üçün indi bu səviyyədəyik. Yenə də arxayınlaşmaq olmaz.

- Komandada tam istədiyiniz şəkildə olmayanlar nələrdi?

- Bəzi mövqelərimizdə çatışmayan cəhətlər var. İstəyirəm ki, dünya çempionatında bir nəfər zədəli olsa, digərləri onu əvəz etmək üçün yüz faiz hazır olsunlar. Həmişə kimsə zədəli olur. Hazırda da 6-7 futbolçu bundan əziyyət çəkir.

- Manuel Noyer üçün il başa çatıb. Onun durumu sizi narahat etmir?

- Arzu edirəm ki, Noyer tezliklə sağalsın. Amma hələ çox fikir eləmirəm. Çünki qısa müddətdə toparlanacağına əminəm. Ter-Ştegen də yaxşı qapıçı olduğunu göstərir.

- Azərbaycan millisi ilk 3 turdan sonra Almaniya ilə birlikdə qrupda liderlik edirdi. Sizcə, komandamızda nə çatmadı?

- Azərbaycan çalışır ki, həqiqətən də, futbol oynasın. San Marino, Norveç kimi oynamırlar. Bakıdakı matçın gedişində hesabı bərabərləşdirmişdilər. Bu, onların gücündən xəbər verir. Məsələn, Almaniyada oynayan Dmitri Nazarovu qeyd edə bilərəm. Məncə, bunun təməlini Berti Foqts qoyub. Niyə davamını gətirə bilmədiklərini bilmirəm. Yeni baş məşqçiləri çox güclüdü. Azərbaycan meydan gizlənməməlidi və gizlənmir də.

- Sabah cari seçmə mərhələnin ən böyük hesabı qeydə alına bilərmi, yoxsa futboolçuları çox yormaq istəmirsiniz?

- Ən böyük fərqə inanmıram. Belə böyük nəticə olmayacaq. San Marino ilə oynamaq bizim üçün daha asan idi, nəinki Azərbaycanla. Onlar qrupda digər komandaların hamısı ilə başabaş mübarizə apardılar. Oyunçuları yormamaq barədə düşünmürəm. Yeni futbolçular üçün bu şansdı ki, özlərini yaxşı tərəfdən göstərə bilsinlər.