“Hazırda baş verənlərin hamısı normaldı. İki il əvvəl “Çelsi” tamamilə zəif çıxış edirdi”. Apasport.az saytının məlumatına görə, bu sözləri Fil Dişi Sahilinin əfsanəvi futbolçusu Didye Droqba deyib.

2004-2012 və 2014-2015-ci illərdə “Çelsi”nin formasını geyinmiş 39 yaşlı hücumçu komandanın cari mövsümdəki çıxışını dəyərləndirib. London təmsilçisinin Çempionlar Liqasında “Roma”ya böyükhesablı (0:3) məğlubiyyətinə təəccüblənən Droqba komandanın qrupdan çıxacağına şübhə etmir.

Onun fikrincə, Antonio Kontenin yetirmələri qrupda “Qarabağ” və “Atletiko” ilə keçirəcəkləri son iki görüşdən qalib ayrılaraq, yoluna davam edəcək: “Əksər futbolçular Çempionlar Liqasında 1/4 final və ya yarımfinal üzü görmürlər. Bu turnirdə iştirak edən oyunçular 3 gündən bir rəqabət aparmağa hazır olmalıdılar. Əlbəttə ki, burda risk böyük olur. Çünki üzərində daim təzyiq hiss edirsən. Çempionlar Liqasında ən yaxşı oyununu göstərməlisən. Bu isə asan deyil. Ancaq mən “Çelsi”nin yer aldığı qrupdan çıxacağına şübhə etmirəm. “Roma”ya uduzmasına baxmayaraq, son iki görüşdə qalib gəlib, vəziyyəti düzəldəcəklərinə inanıram”.

Qeyd edək ki, “Çelsi” Çempionlar Liqasının növbəti turunda noyabrın 22-də “Qarabağ”ın qonağı olacaq.