18 yaşadək oğlanlar arasında Şərqi Avropa Voleybol Zonaları Assosiasiyalarının (EEVZA) çempionatında ikinci oyun gününə start verilib. Apasport.az saytının məlumatına görə, Belarusun paytaxtı Minskdə keçirilən yarışda qüvvəsini sınayan Azərbaycan millisi 3-cü oyununa çıxıb.

Komandamız Rusiya ilə üz-üzə gəlib. İlk iki qarşılaşmada Belarus və Estoniyaya eyni – 0:3 hesabı ilə uduzan millimiz bu dəfə də meydanı xalsız tərk edib.

Düzdü, voleybolçularımız gərgin keçən ilk setdə çətin qələbə qazana bilib. Lakin uğurun ardını gətirə bilməyən yığmamız məğlubiyyətlə barışmalı olub - 1:3 (26:24, 20:25, 15:25, 14:25).

Qeyd edək ki, millimiz sabah Latviya və Ukrayna ilə üz-üzə gələcək.