Yeni mövsümdə Çempionlar Liqasında debüt edəcək “İqtisadçı” ilk transferini rəsmiləşdirib. Apasport.az saytının məlumatına görə, Bakı təmsilçisi Çin millisinin oyunçusu Vey Kiuyue ilə anlaşıb.

25 yaşlı toppaylayıcı ilə 1 illik razılıq əldə olunub. O, “Tianjin” klubundan transfer olunub.

Maraqlıdır ki, Kiuyuenin klub karyerası məhz bu komandaya bağlıdır. Öncə gənclərdən ibarət heyətdə forma geyinən Vey 2003-cü ildən əsas komandanın şərəfini qoruyur.

182 sm boya malik toppaylayıcı “Tianjin”la 7 dəfə Çin çempionu, 3 dəfə Asiya Çempionlar Liqasının qalibi olub. O, həmçinin ölkə çempionatında gümüş medal da qazanıb.

2006-cı ildə əsas milliyə dəvət alan yeni “tələbə” burada 200-də artıq oyuna çıxıb. Kiuyue Asiya Oyunlarının (2010), Asiya çempionatının (2011) və Asiya Kubokunun (2008, 2010) qalibi olub.

Bundan əlavə, onun medal kolleksiyasında qitə çempionatının 2 (2007, 2009), dünya Qran-prisinin 1 gümüş (2007), Pekin Yay Olimpiya Oyunlarının (2008) və dünya çempionatının bürünc (2011) medalları var. Vey mükafat qazandığı bu yarışların çoxunun ən yaxşı toppaylayıcısı seçilib. Sevimli nömrəsi “8”dir.

• Azərbaycan kubokunun keçiriləcəyi tarixlər bəlli olub
• Təmsilçimiz Avropa çempionu olub
• “Azərreyl” Avropa Kubokunun qalibi olub
• Daha bir Azərbaycan komandası finalda
• “Azərreyl” finala yüksəlib