“Rusiya yığması ilə oyun mənim milli karyeramda son matçdı. Yığmadakı çıxışlarımı başa vurmaq haqda qərar qəbul etmişəm”. Apasport.az saytının məlumatına görə, bunu Azərbaycan millisinin və Rusiyanın “Omiçka” klubunun voleybolçusu Natalya Məmmədova deyib.

Avropa çempionatının Almaniya və İsveçrədə keçirilən final mərhələsində çıxışını erkən başa vuran yığmamızın 29 yaşlı kapitanı 9 ildir şərəfini qoruduğu millimizdən getməyə qərar verib.

Qrup mərhələsinin sonuncu turunun oyununda Rusiyaya 0:3 hesabı ilə uduzduqdan sonra Məmmədov bu ölkənin “Sport-express” nəşrinə verdiyi açıqlamada bu addımını belə izah edib: “Artıq gələn il 30 yaşım olacaq. Gənclərə özünü göstərmək imkanı verməyin vaxtı çatıb. Lakin millidən qəmgin gedirəm. Biz Avropa çempionatında bütün oyunlarda uduzduq, evə qayıdırıq. Hərçənd, çempionatın startına qədər fərqli nəticəyə ümid edirdik. Təəssüf ki, heç nə alınmadı. Mən çox üzgünəm. Biz Rusiya ilə oyunda yaxşı oyun göstərdik, çempionatdakı ən yaxşı matçımızı keçirdik. Lakin bu, qələbə üçün kifayət etmədi”.

Qeyd edək ki, əslən Ukraynadan olan, milliləşdirilənə qədər Skazka soyadını daşıyan hücumçu millimizin qatıldığı bütün Avropa çempionatlarında (2005, 2007, 2009, 2011, 2013) yığmamızın şərəfini qoruyan azsaylı voleybolçularımızdandır.

• Yığmamızdan qələbə ilə start
• III MDB Oyunları: Voleybol yarışlarının təqvimi açıqlanıb
• Voleybol üzrə Yüksək Liqaların yeni mövsümünün püşkü atılıb - FOTO
• Bakı təmsilçisindən yeni transfer
• “Murov Az Terminal"da yeni müqavilə