Sabah qadın voleybolçular arasında CEV kubokunun “Çelenc raund”unda cavab görüşlərinə start veriləcək. Apasport.az saytının məlumatına görə, birinci oyun günün yeganə qarşılaşmasında “Azəryol” Polşa “Bank Fakro”sunu qəbul edəcək.
İlk matçda 2:3 hesabı ilə uduzan Ancelo Vercesinin yetirmələri cütün favoriti olsalar da, oyunun asan keçəcəyi gözlənilmir. Çünki 1/4 finalda “Lokomotiv”ə hər 2 görüşdə qalib gələn rəqib bu dəfə də Bakıya eyni arzu ilə gəlir.
Lakin “Azəryol”un “dəmiryolçular”la müqayisədə şansı daha yüksəkdir. Səfərdə qazanılan 2 set onların köməyinə gələ bilər. Hətta yarışda sonadək irəliləməyi hədəfləyən “Azəryol” qarşılaşmanın taleyini əsas vaxtda da həll edə bilər. Bunun üçün komandamız 3:0 və ya 3:1 hesabı ilə qalib gəlməlidir.
Əgər “Bank Fakro” 2:3 hesabı ilə uduzarsa, həmin halda “Qızıl set”ə ehtiyac olacaq. “Lotereya”da da doğma divarlar və azarkeş amili “Azəryol”un köməyinə gələ bilər.
CEV kuboku
Çelenc raund, cavab oyunu
18:00. “Azəryol” (Azərbaycan) – “Bank Fakro” (Polşa)
Hakimlər: Sergey Qulka (Ukrayna), Aleksandr Tubilov (Rusiya)
Bakı, Voleybol Mərkəzi
İlk oyun: “Bank Fakro” (Polşa) – “Azəryol” (Azərbaycan) – 3:2 (25:20, 22:25, 22:25, 28:26, 15:13)
Qeyd edək ki, bu cütün qalibi “Fənərbaxça” (Türkiyə) – “Agel” (Çexiya) duelinin güclüsü ilə qarşılaşacaq.
Oxşar xəbərlər
Ana səhifə
Bütün xəbərlər