"Sumqayıt"ın qolkiperi Aydın Bayramovun apasport.az saytına müsahibəsi
- Son turda "Kəpəz"i səfərdə məğlub edə bildiniz. Matç sizin üçün necə alındı?
- Matç çox gərgin alındı. Hava şəraiti bir tərəfdən, oyunun gərginliyi də öz sözünü dedi. Əslində, oyuna çox yaxşı hazırlaşmışdıq və Qəbələyə də qələbə arxasınca yollanmışdıq. Şadam ki, qalib gələ bildik.
- Vurduğunuz qolun ofsayd olduğu görünürdü və çox müzakirə edildi. Yəqin epizodun təkrarına baxmısan. Epizodu necə şərh edərdin?
- VAR kamerası hər şeyi aydın göstərir. Məncə, Todor Todoroski ilə Vüsal İsgəndərli eyni xətdə idi.
- "Kəpəz"ə qarşı Qəbələdə, yoxsa Gəncədə oynamaq çətindir?
- Təbii ki, Gəncədə oynamaq hər komanda üçün çətindir. Məncə, azarkeş amili öz sözünü deyir. Hər halda, Gəncədə yerli publika komandaya öz dəstəyini verir. Ona görə, məhz orada oynamağın daha çətin olduğunu deyə bilərəm.
- "Sumqayıt hazırda 28 xalla 8-ci pillədədir. Səncə, komanda Premyer Liqadakı yerini artıq qoruyub, yoxsa təhlükəni yenə hiss edirsiz?
- Premyer Liqada qalmaq uğrunda gərgin mübarizə gedir. Bu mübarizə mövsümün sonuncu oyununa qədər də gedəcək. Ona görə də, indidən bir söz demək olmur. Sonda necə olacağını hamımız birlikdə görəcəyik.
- Bir müddət əsas heyətdə meydana çıxmadın. Bu nə ilə əlaqədar idi?
- Zədə səbəbindən. Çünki bir aya yaxın idi, komanda ilə məşq etmirdim. Müalicə olurdum. Ona görə də, oynamırdım. İndi hər şey yaxşıdır.
- Növbəti turda "Səbail"lə qarşılaşacaqsız. Yəqin ki, bu matç sizin üçün liqada qalıb-qalmamaq baxımından önəmli olacaq...
- Doğrudur, "Səbail"ə qarşı matç çox vacibdir. Əslində, həm biz, həm də onlar üçün vacibdir. Qələbə qazana bilsək, işimizi bir az da asanlaşdıracağıq. İstəyimiz də budur.
- Mövsüm sonunda "Turan Tovuz"a keçəcəyin deyilir. "Sumqayit"dan mövsümün sonu ayrılacaqsan?
- Mövsümün sonuna qədər "Sumqayıt"la müqaviləm var. Komanda ilə bu haqda danışacağıq. İndidən nəsə deməyim doğru çıxmaz.
Oxşar xəbərlər
Ana səhifə
Bütün xəbərlər
Hesabım