Bakıda Əməkdar məşqçi Aleksandr Antipovun xatirəsinə həsr olunmuş atletika üzrə beynəlxalq qış yarışının açılış mərasimi keçirilib.
Apasport.az xəbər verir ki, Gənclər və İdman Nazirliyi, AAF və “Atletika” klubunun birgə təşkilatçılığı ilə keçirilən turnir “Paris-2024” Yay Olimpiya Oyunlarına lisenziya xarakteri daşıyır.
Fevralın 3-də yekunlaşacaq yarış Azərbaycan, Qazaxıstan, Qırğızıstan və Saxa-Yakutiya Respublikasını təmsil edən idmançıların paradı ilə başlayıb.
Azərbaycan Atletika Federasiyasının vitse-prezidenti Könül Nurullayeva ölkədə bu cür turnirlərin təşkilinin vacib olduğunu bildirib. Atlet Nazim Babayevin Çexiyada keçirilmiş lisenziya xarakterli yarışda qazandığı uğurdan bəhs edib federasiya rəsmisi idmançılara böyük ümidlər bəslənildiyini vurğulayıb.
Gənclər və İdman Nazirliyinin nümayəndəsi Sevda Mirzəyeva isə yarışın bu il keçiriləcək beynəlxalq turnirlərə seçim xarakteri daşıdığını söyləyib.
Rəsmi çıxışlardan sonra Azərbaycanın Dövlət Himni səsləndirilib və turnirə start verilib.
Respublika Olimpiya Mərkəzində keçirilən yarış proqramına U-18 yaş qrupu üzrə uzunluğa tullanma və 60 metr məsafəyə qaçış, böyüklər üzrə üç təkanla tullanma və digər növlər daxil edilib.
Oxşar xəbərlər
Ana səhifə
Bütün xəbərlər
Hesabım