Almaniya mətbuatı Azərbaycan milli komandasının 62 yaşlı baş məşqçisinin ölkəmizə ilk səfərinə həsr olunan yazıda A.Rəhimovun fikirlərinə də yer ayırıb: “Bizə elə gəlir ki, 10 ildən sonra Almaniyada olduğu kimi, Azərbaycanda da stadionların tribunaları dolu olacaq. Amma indi vaxtilə minlərlə tamaşaçının gəldiyi stadionda seyrçilərin sayı 100-200 olur”. Nazir almaniyalının seçilməsinin səbəbini də izah edib: “Seçimimizi ona görə Foqtsun üzərində dayandırmışıq ki, Almaniya futbol məktəbini uğur modeli sayırıq”. Almaniyalılar A.Rəhimovun Azərbaycan - Almaniya matçı ilə bağlı arzusunu da öyrənə bilib: “2:2. Bu oyunda qələbə yəqin ki, çox böyük tələb olardı. Arzu edək ki, Polşaya 0:5, Serbiyaya 1:6 hesabları bir də təkrarlanmasın”.