Kursk. Vüqar Xeyrullayev – APA-Sport. Rusiya çempionatının ikinci divizionunda çıxış edən Kurskun “Avanqard” klubunun qapısını azərbaycanlı futbolçu qoruyur. “APA-Sport” agentliyinin məlumatına görə, Sumqayıt futbolunun yetirməsi olan 29 yaşlı Ruslan Səfərov Mərkəz zonasında çıxış edən “Avanqard”ın iştirak ərizəsinə daxil edilib. 2004-cü ildə Kursk təmsilçisinə gələn hündürboylu (192 sm) R.Səfərov komandasının birinci divizionda çıxış etdiyi son iki mövsümdə cəmi 2 dəqiqə meydanda olub. Ötən il birinci divizionu tərk edən “Avanqard”ın qapıçısı yalnız bir oyunun 89-cu dəqiqəsində meydana daxil olub. 2004-05-ci illərdə “Avanqard-2”nin formasını daşıyan R.Səfərov 2004-cü ildə Kursk vilayətinin çempionu, iki il sonra Çernozemye birinciliyinin ən yaxşı qapıçısı, 2005-ci ildə isə bürünc mükafatçısı olub. Karyerasının bir hissəsini futzala həsr edən qapıçı 2001-ci ildə Moskvanın “Titan” klubunun heyətində Rusiya çempionatının bürünc mükafatını qazanıb.
Qeyd edək ki, ikinci divizionda yalnız bu ölkənin vətəndaşları çıxış edə bildiyindən R.Səfərov da Rusiya vətəndaşlığını daşıyır.