İlqar Qurbanov Türkiyə çempionatında neçə dəqiqə oynayıb?

12.05.2008 - 12:25

Bakı. Vüqar Xeyrullayev-APA-Sport. Azərbaycan yığmasının futbolçusu İlqar Qurbanov şərəfini qoruduğu “Sivasspor” klubunun heyətində Türkiyə çempionatında cəmi 127 dəqiqə oynayıb. “APA-Sport” agentliyinin məlumatına görə, 22 yaşlı yarımmüdafiəçi komandasının keçirdiyi 34 matçdan yalnız 9-da meydana çıxıb. Keçirdiyi qarşılaşmaların hamısında sonradan komanda yoldaşını əvəzləyən İ.Qurbanov 127 dəqiqəyə 1 qol vurub, 1 məhsuldar ötürmə verib və 2 sarı vərəqə ilə cəzalanıb. Türkiyə Superliqasının son 15 qarşılaşmasında oynamaq şansı qazanmayan yarımmüdafiəçi daha 8 görüşdə ehtiyat oyunçular skamyasında əyləşib. 21-ci turdan sonra keçirilən son 13 matçdan yalnız birində - 31-ci turun “Ankaraspor”la qarşılaşmasında baş məşqçi Bülənt Uyğun İ.Qurbanovu ehtiyat oyunçular skamyasında əyləşməsini məsləhət bilib. Çempionatın digər 17 matçında isə yarımmüdafiəçinin adı “18-liy”ə də daxil edilməyib. Ölkə çempionatını 4-cü yerdə bitirən “Sivasspor” klubu İntertoto kubokuna vəsiqə qazanıb. Bu yarışa ikinci mərhələdən başlayacaq İ.Qurbanovun komandası Bosniya və Herseqovina ilə Çernoqoriya təmsilçiləri arasında qarşılaşmanın qalibi ilə üz-üzə gələcək.

tur	Rəqib	hesab	meydan	Dəqiqə	Qol(ötürmə)	Vərəqə
2	“İstanbul BB”	2:1	e	26	-	1
3	“Fənərbaxça”	0:1	s	24	-	-
4	“Qaziantepspor”	2:0	e	20	-	-
11	“Kasımpaşa”	4:0	e	7	-	-
12	“Beşiktaş”	2:1	s	9	1 (1)	1
14	“Ankaraspor”	0:2	s	5	-	-
16	“Qalatasaray”	0:2	s	16	-	-
17	“Gənclərbirliyi”	2:0	e	17	-	-
19	“İstanbul BB”	2:0	s	3	-	-