49 yaşlı mütəxəssis “Neftçi”nin prezidenti Əkbər Hacıyevin bu istiqamətdə ilkin addımlar atdığını söyləyib: “Ukraynada olduğum zaman Əkbər Hacıyevin Kiyevə səfəri oldu. Onu “Dinamo”nun bazası ilə tanış etdim. Hacıyevin “Dinamo” klubunun prezidenti İqor Surkislə də görüşü oldu. Təxminən saat yarım çəkən söhbət səmərəli keçdi. Hər iki prezident klublarının gələcəkdə sıx dostluq münasibətlərində olmasında, qarşılıqlı əməkdaşlıqda maraqlıdırlar”. A.Demyanenko bildirib ki, əməkdaşlıqla bağlı müqavilənin detalları müzakirə edilib: “Bütün detallar razılaşdırıldıqdan sonra sənəd rəsmi imzalanacaq. Hesab edirəm ki, bunun həm “Neftçi”, həm də Azərbaycan futboluna böyük xeyri dəyəcək”. Prezidentlərin görüşündə, həmçinin “Dinamo”dan “Neftçi”yə futbolçu transfer edilməsi məsələsi müzakirə edilib.