Bakı - APA-Sport. “Fənərbaxça” prezidentliyinə ilk namizəd qeydə alınıb. “APA-Sport”un məlumatına görə, bu, klubun İdarə Heyətinin üzvü Kemal Açıkgöz olub. O, mətbuat konfransı keçirərək, 2009-cu ilin mayında baş tutacaq seçkiyə qatılacağını rəsmən bəyan edib.

“Sarı-lacivərdlilər”in göstərdiyi nəticələrdən və transferlərə külli miqdarda pul xərclənməsindən narazılığını bildirən 69 yaşlı Açıkgöz hazırkı prezident Əziz Yıldırımın hakimiyyətinə son qoymaq istəyir: “Namizədliyimi verməklə bağlı 4 ay düşündüm və sonda qəti qərara gəldim. Prezident kürsüsündə futbolu yaxşı bilən şəxs oturmalıdır. Seçkidə qalib gələcəyim təqdirdə, Yıldırama fəxri prezidentliyi təklif edəcəyəm”.

Vaxtilə biznes sahəsində çalışan Açıkgöz 1972-ci ildən “Fənərbaxça”nın İdarə Heyətinin üzvüdür. Onun İstanbul klubunun gələcəyi ilə bağlı çoxlu planları var: “Əgər bu planları həyata keçirə bilsək, ildə 10-15 milyon avro qazanc əldə olunacaq”.

Qeyd edək ki, Əziz Yıldırım son 10 ildə “Fənərbaxça”nın prezidenti vəzifəsini daşıyır. Qarşıdakı seçkidə onun şansları yüksək qiymətləndirilsə də, Yıldırım hələlik namizədliyini irəli sürməyib.

• Bellinqem matçın oyunçusu seçildi, "layiq deyiləm" dedi
• “Atletiko”dan sərt addım - “Barselona”dan FIFA-ya şikayət ediləcək
• "Bavariya"nın qapıçısı “Beşiktaş”ı istəyir - Rəhbərliyə bildirdi
• İkardiyə ölkədən çıxış qadağası - Vanda Nara şikayət edib
• Remzidən gözlənilməz qərar - 35 yaşında baş məşqçi oldu