“Qarabağ” 15-ə çatdı

19.04.2010 - 10:07

Ağdamın “Qarabağ” klubu Azərbaycan çempionatları tarixində 15-ci dəfə böyük hesabla uduzub. Apasport.az saytının hesablamalarına görə, bütün birinciliklərin iştirakçısı olmuş 3 komandadan biri 3 illik fasilədən sonra yenə ağır zərbə alıb.

Unibank Premyer Liqasının XXVIII turunda “Qarabağ”ı Quzanlıda 4:1 hesabı ilə məyus edən “Bakı” meydan sahiblərinin böyük hesabla uduzmamaq seriyasını dayandırıb. Ağdam təmsilçisi sonuncu belə məğlubiyyəti hələ Rasim Karanın baş məşqçi olduğu vaxtda almışdı. 2006/07 mövsümünün sonlarında ardıcıl iki görüşdə darmadağın olan “Qarabağ” mayın 7-də öz meydanında – Suraxanı qəsəbə stadionunda “Xəzər-Lənkəran”a uduzub – 1:4. 1076 gündən sonra yenə evdə, eyni hesaba üzülən “Qarabağ” həmin görüşdən 5 gün sonra Zaqatalaya yola düşmüşdü. İndiki baş məşqçi Qurbanovun həmyerliləri qonaqları 3 qola qonaq etmişdi. Həmin matç ukraynalı Vladimir Mazyarın het-triki ilə əlamətdar olmuşdu. Zaqataladakı uğursuzluqdan 1071 gün sonra isə Quzanlıda darmadağın qeydə alınıb.

“Qarabağ”ın milli çempionatdakı böyük hesablı məğlubiyyətləri

mövsüm	Böyük hesablı məğlubiyyət
1992	0
1993	0
1993/94	1
1994/95	1
1995/96	1
1996/97	0
1997/98	1
1998/99	2
1999/2000	0
2000/01	3
2001/02	Yarımçıq qalıb
2003/04	1
2004/05	2
2005/06	0
2006/07	2
2007/08	0
2008/09	0
2009/10	1
Cəmi	15