"Real"ın holland futbolçusu Rafael van der Vaart karyerasını İngiltərədə davam etdirəcək. Son iki mövsümü "blankos"da keçirən yarımmüdafiəçi "Tottenhem"ə keçib. 27 yaşlı futbolçu ilə "Bavariya" maraqlansa da, sonradan bu sövdələşmə baş tutmayıb.

Münhenlilər futbolçunun transfer qiymətinin həddən artıq baha olması səbəbindən Vaartı heyətinə qatmaqdan imtina edib. Van der Vaartın "Tottenhem"ə 18 milyon funt-sterlinqə başa gəldiyi bildirilir. Rafael ötən mövsüm "Real"ın heyətində 26 oyunda meydana çıxaraq 6 qol vurub.

"Real"da iki il oynamış pleymeyker "Tottenhem"ə keçməyə razılıq versə də, "mahmızlılar"ın baş məşqçisi Harri Rednapp bu keçidi klubunun transfer bazarında növbəti böyük qələbəsi saymır: "Hər şey son anda baş verdi. Həmin günün səhəri transfer barədə düşünmürdüm. Anlaşmanı İngiltərə premyer-liqasının təsdliqləməsi gərəkdi. Ümid edirəm ki, "transfer pəncərəsi" bağlanana qədər bütün rəsmiyyəti başa vura bilmişik".

Onun sözlərinə görə, "Real" sonucda van der Vaartın transfer qiymətini aşağı salıb: "Mən biləni "Bavariya" onu 18 milyon avroya almaq istəyirdi. Sonra həmin qiymət qəflətən xeyli ucuzlaşdı. Təbii ki, Rafaeli əldə etmək üçün əlimizdən gələni etdik".

Rednapp daha sonra bildirib ki, komandanın bir neçə oyunçusu başqa klublara icarəyə verilə bilər.

• "Mançester Siti"nin keçmiş kapitanı və baş məşqçisi vəfat edib
• Mərc qalmaqalı üzə çıxıb: İspaniyalı futbolçu saxlanılıb
• Fatih Terimin komandasında ayrılıq
• Malen "Aston Villa"da
• Emre Belözoğlu “Antalyaspor”da