“Xəzər Lənkəran”ın növbəti yubileyi

26.10.2010 - 10:28

“Xəzər Lənkəran” Unibank Premyer Liqasının X turunda “Turan”la ev oyununda yubileyə imza atıb. Apasport.az saytının məlumatına görə, komanda 6 illik tarixində milli çempionatımızda 100-cü qələbəsinə qazanıb. Bununla da Lənkərandakı son görüşdəki uğur xüsusi çəkiyə malik olub. “Xəzər Lənkəran” indiyədək Premyer Liqada 99 dəfə qələbə qazanmışdı ki, “Turan”la görüşdə qazanılan 3 xal çempionatdakı 100-cü qalibiyyət oldu.

Lənkəranlılar bu yubileyi 3 turdur gözləyirdi. Belə ki, “Bakı” ilə (1:1) VIII turun evdə və “Gəncə” ilə (1:4) IX turun səfərdəki görüşlərində 100-cü qələbə arzusu təxirə salınırdı. Bu dəfə isə yubileyə mane olan tapılmadı.

Cənub təmsilçisi tarixinin ilk qələbəsini 2004-cü ildə qazanıb. Bu, 2004/05 mövsümünün II turunun avqustun 12-də “Şəfa” ilə görüşdə reallaşıb – 2:1. 50-ci yubiley qələbəsi isə 2006/07 mövsümünün son turuna, ilk çempionluğunun rəsmiləşdiyi oyuna təsadüf edib. Söhbət 2007-ci il mayın 23-də Qəbələdə “Gilan” üzərində 3:0 hesabı ilə qələbə qazanılan oyundan gedir. “Xəzər Lənkəran” səfər oyununda həm 50-ci qələbəsini, həm də hələ ki yeganə çempionluğu qazanan tərəf olmuşdu.

Mövsüm	Turnir	Oyun	Qələbə
2004/05	Çempionat	35	24
2005/06	Çempionat	26	9
2006/07	Çempionat	24	17
2007/08	Çempionat	26	14
2008/09	Çempionat	26	15
2009/10	Çempionat - I mərhələ	22	12
	Çempionat - II mərhələ	10	3
2010/11	Çempionat	10	6
Yekun		179	100

Qeyd edək ki, 2004/05 mövsümündə “Şəfa” ilə çempionatın II dövrəsinə təsadüf edən texniki qələbəli (3:0) oyun bu sayda əks olunub. 2009/10 mövsümü iki mərhələdən ibarət olub. İlk mərhələdən sonra 12 klub iki “altılığ”a bölünüb. Onlar birinci mərhələdə toplanılan xallar saxlanmaqla, mübarizəni davam etdirib.

Mənbə: lankaranfc.com