Kolleksiyasını tamamlayan “İnter”, yaxud Sxadadze Xodukinə şərik oldu

12.05.2012 - 11:45

Bakının “İnter” klubu Azərbaycan milli çempionatlarında medal kolleksiyasını tamamladı. Apasport.az saytının məlumatına görə, 2004-cü ilin yayından bu adı daşıyan komanda tarixində ilk dəfə bürünc medalçı oldu. Bunadək qızıl və gümüş medalı qazanan “bankirlər”in yalnız bürüncü çatmırdı ki, ona yubiley – XX çempionatımızda nail olundu. “İnter” bunu ardıcıl 3-cü ildir baş məşqçisi olan Kaxaber Sxadadzenin rəhbərliyi altında qazandı. Son turda evdə “Bakı”ya 1:0 hesabı ilə qalib gələn komanda 3-cü yerdə olan “Qarabağ”ın səfərdə “Xəzər Lənkəran”a uduzmasından istifadə edərək, həmin pilləni rəqibinin əlindən aldı.

“İnter”in indiyə kimi baş məşqçilərinin hamısının əcnəbi olduğunu nəzərə alsaq, avtomatik bütün mükafatlar qeyri-azərbaycanlıların payına düşür. “Bankirlər”in 2-ci və hələ ki son çempionluğunu da 44 yaşlı gürcü çalışdırıcısının rəhbərliyi altında qazanıb. Onda “İnter”in “sükanı arxası”nda debüt mövsümündə buna nail olan Sxadadze ötən mövsüm 5-ci yeri tutaraq, nəinki mükafatsız, avrokuboklara vəsiqəsiz də qaldı. Yəni “İnter” yenidən mükafatçı olmaqla, 2 ildən sonra qitə miqyaslı turnirə də çıxdı.

Ümumiyyətlə, milli çempionatımızda əldə edən əcnəbi məşqçilərin sayı 8 olub. Yalnız “İnter”in məşqçiləri 2 ayrı medalçı olub ki, Sxadadzenin əvəzlədiyi ukraynalı Valentin Xodukin komandanın ilk çempionluğunu qazanmışdı. Ümumilikdə 10 mükafat qazanan gəlmələr ölkəmizdə 3 qızıl, 4 gümüş və 3 bürünc əldə ediblər. Son 2 ildə gümüş medal əcnəbi məşqçilərə qismət olurdusa, bu dəfə onu yerli mütəxəssis – “Xəzər Lənkəran”ın baş məşqçisi Yunis Hüseynov qazandı. Bununla da o, 4 illik sindromu qırdı. Belə ki, milli çempionatımızın son gümüş medalını qazanan yerli məşqçi Əsgər Abdullayev buna 2007/08 mövsümündə “Olimpik”lə nail olaraq, çempionluğu məhz “İnter”ə uduzdu. Bununla da Xodukin ölkəmizdə ilk titul qazanan əcnəbi mütəxəssis kimi adını futbol tariximizə qızıl hərflərlə yazdırdı.

Milli çempionatımızın medalçıları 5 ölkə - Türkiyə, Ukrayna, Makedoniya, Gürcüstan və Rumıniyanın təmsilçiləridir. Mükafat sayındakı rekordçu isə “İnter”in çalışdırıcılarıdır. Belə ki, Sxadadze də 73 yaşlı ukraynalı həmkarı kimi 2 medalçı olaraq, rekorduna şərik çıxdı. Fərq ondadır ki, Xodukin bunun birində qızıldan sonra gümüşü qazandığından, əyarına görə gürcü həmkarından üstündür. Əcnəbilərlə medal qazanan klublar arasında də “İnter” öndədir – 2 qızıl, 1 gümüş, 1 bürünc. Xodukinin təmsil etdiyi Ukrayna isə 1 qızıl, 1 gümüş və 2 bürünclə ölkələr arasında liderlik edir.

“Bilrlik kuboku”nu da qazanan “İnter”in kolleksiyasında yalnız Azərbaycan kuboku yoxdur ki, bu dəfə finala çıxa bilmədiyindən, kolleksiyasını birdəfəlik tamamlamaq üçün azı 1 il gözləməli olacaq. Maraqlıdır ki, “bankirlər” indiyə kimi 4 dəfə kubokun finalına çıxsa da, nə Sxadadze ilƏ Xodukin, nə də ilk baş məşqçisi olan ukraynalı Anatoli Konkovla sonda uğur qazanıb.

Azərbaycan milli çempionatının medalçıları olan əcnəbi məşqçilər

2004/05	Rasim Kara	Xəzər Lənkəran	gümüş	Türkiyə
2007/08	Valentin Xodukin	İnter	qızıl	Ukrayna
2007/08	Anatoli Demyanenko	Neftçi	bürünc	Ukrayna
2008/09	Valentin Xodukin	İnter	gümüş	Ukrayna
2008/09	Qyoko Hacıyevski	Bakı	qızıl	Makedoniya
2008/09	Roman Pokora	Simurq	bürünc	Ukrayna
2009/10	Cüneyt Biçər	Bakı	gümüş	Türkiyə
2009/10	Kaxaber Sxadadze	İnter	qızıl	Gürcüstan
2010/11	Mirça Rednik	Xəzər Lənkəran	gümüş	Rumıniya
2011/12	Kaxaber Sxadadze	İnter	bürünc	Gürcüstan

Qeyd edək ki, Sxadadze ölkəmizdə ilk olaraq “Standard”la çalışsa da, 2008-ci ilin yanvarından 2009-cu ilin yanvarına rəhbərlik etdiyi Bakı komandası ilə mükafatçı ola bilməyib.

Mehman SÜLEYMANOV