“Birinci oyun çox vacibdi. Qarşımızdakı komanda çox güclüdü”. Apasport.az saytının məlumatına görə, bu sözlər “Neftçi”nin baş məşqçisi Roberto Bordinə məxsusdu.
Sabah Avropa Liqasında mübarizəyə start verəcək “ağ-qaralar” I təsnifat mərhələsi çərçivəsində “Uypeşt”lə üz-üzə gələcək.
Oyunöncəsi baş tutan mətbuat konfransında italiyalı çalışdırıcı fikirlərini bildirib: “Son ayları boş keçirməmişik. Yaxşı start arzusundayıq. Azarkeşlərimizin önündə oynamağa hazırıq”.
- Yoldaşlıq oyunlarındakı nəticələr sabahkı matça necə təsir edə bilərmi?
- Nəticə hər zaman vacibdi. Ancaq yoldaşlıq görüşlərində əsas oyunçuların anlaşmasını təmin etmək idi. Məqsəd futbolçuların fiziki göstəricilərini yaxşılaşdırmaq idi.
- Yoldaşlıq oyunlarında daha çətin rəqib seçmək olmazdı? Nəzərə alsaq ki, II mərhələdə “Sevilya” ilə qarşılaşmaq ehtimalı var...
- Yoldaşlıq görüşlərində bütün oyunçulara şans vermək imkanımız oldu. Rəqiblərin kimliyinin o qədər də önəmi yoxdu. “Sevilya”ya gəlincə, “Uypeşt” səddini keçməmiş o barədə danışmaq erkəndi.
- Əsasən “Neftçi” üçün yad olan 4-3-3 sistemindən istifadə edirsiz. Komandanın artıq bu sistemə alışdığını demək olarmı?
- Əvvəlki məşqçilərin hansı sistemlərə üstünlük verməsi barədə məlumatsızam. Sadəcə, 4-3-3 sevdiyim sistemdi. Ancaq bunun oyunun gedişində sabit qalacağını deyə bilmərəm.
- Fiziki baxımdan komanda nə qədər “artırıb”?
- Yaxşı fiziki hazırlıq keçmişik, ancaq 100 faiz desək, absurd olar. Çempionata başlayana qədər maksimum hazır olmağa çalışacağıq. Əsas məqsəd bu oyuna hazır olmaq idi.
- İkinci mərhələdə “Sevilya” ilə qarşılaşmaq ehtimalı futbolçuların motivasiyasını azaltmır?
- “Sevilya” barədə düşünmürük. Bu dəqiqə tək məqsədimiz “Uypeşt”lə ev-səfər oyunlarıdı.
- Karikari, Frederiko kimi legionerlərlə yanaşı, Bəşirov kimi gənclər Türkiyə toplanışına dəvət olunmuşdu. “Neftçi”dəki yerli gənclərin potensialı sizi nə dərəcə qane edir?
- Əcnəbilərlə yerlilər birlikdə yaxşı anlaşırlar. Oyunları alınır. Ümid edirəm ki, həm yeni oyunçuların inteqrasiyası tez olacaq, həm də gənclər gələcəkdə “artıracaqlar”. U-21 yığmasında oynayan gənclərimiz var. Onlardan çox razıyam. Zaman keçdikcə, çətinliklərə dözdükcə təcrübəli futbolçulardan daha da çox şey öyrənəcəklər.
- Karikari komandaya gec qoşulub. Onun sabah heyətdə olmaq ehtimalı varmı?
- Karikari güclü oyunçudu. Potensialı sabahkı oyunda oynamasına imkan verir. Ancaq ümumi kimlərin çıxış edəcəyini məşqdən sonra dəqiq biləcəm.
- Adətən əcnəbi məşqçilər özləri ilə məşqçilər korpusunu da gətirirlər. Ancaq sizdə cəmi bir belə mütəxəssis var. Azərbaycanlı çalışdırıcılarla işlərinizi qaydasına qoya bilərsizmi?
- İtaliyalılardan təkcə Andrea mənimlədi. Onunla uzun müddət birlikdə çalışmışıq. Yerli məşqçilər isə yerli futbolçuları yaxşı tanıyırlar. Təcrübələrimizi birləşdirib, yaxşı vəhdət yaradacağıq.
Oxşar xəbərlər
Ana səhifə
Bütün xəbərlər